Berdaq atındaǵı Qaraqalpaq mámleketlik universitetinde Ózbekstan Respublikasında «Buxgalterler hám auditorlar kúni» múnásibeti menen milliy buxgalterlik hám auditorlıq kásibiniń zamanagóy rawajlanıwı, mashqalaları hám perspektivalarına baǵıshlanǵan respublikalıq ilimiy-ámeliy konferenciya bolıp ótti.

Onda jetekshi joqarı oqıw orınlarınıń professor-oqıtıwshıları, auditorlar, buxgalterler, doktorantlar, izleniwshiler, magistrantlar hám ziyrek studentler qatnastı.
Ilajda Qaraqalpaq mámleketlik universitetiniń Xalıqaralıq birge islesiw boyınsha prorektorı T.Nurımbetov, Еkonomika fakulteti dekanı K.Kudiyarov, Tashkent mámleketlik ekonomika universitetiniń Buxgalteriyalıq esap kafedrası professorı R.Dusmuratovlar shıǵıp sóylep, buxgalteriya hám audit tarawınıń zamanagóy rawajlanıw baǵdarları, xalıqaralıq tájiriybeler, milliy standartlar hám innovaciyalıq kózqaraslar haqqında óz pikirlerin bildirdi.
Ilimiy-ámeliy konferenciyanıń shólkemlestiriliwi Ózbekstanda ámelge asırılıp atırǵan buxgalteriyalıq esap hám auditorlıq jumısı menen baylanıslı keń kólemli reformalarǵa qosımsha ilaj bolıp, keleshekte professional buxgalter, auditor hám basqa ekonomikalıq kásiplerdi iyelewge umtılıp atırǵan, qızıǵıwshı hám ziyrek studentler ushın oǵada áhmiyetli bolıp tabıladı.
Bul ilimiy-ámeliy konferenciya milliy buxgalteriya hám audit sistemasınıń zamanagóy rawajlanıwında úlken áhmiyetke iye bolıp, tarawǵa baylanıslı jańa ideya hám kózqaraslardı ámeliyatqa engiziwge salmaqlı úles qosadı. Konferenciya buxgalteriyalıq esap hám audit tarawında alıp barılıp atırǵan transformaciya processleri, onıń rawajlanıw baǵdarları hám júzege kelip atırǵan mashqalaların keń jámiyetshilik arasında dodalap barıw hám tarawdıń ele de rawajlanıwı ushın zárúr esaplanadı.
Ilajda qatnasıwshılardıń tarawdaǵı ayırım máseleler boyınsha pikir-usınısları tıńlanıp, olar ózlerin qızıqtırǵan sorawlarǵa juwap aldı.

Qaraqalpaqstan xabar agentligi.