Qaraqalpaqstan Respublikasınıӊ Nókis qalasında eki Hákimshilik oray shólkemlestiriledi. Bul haqqında usı jıldıӊ 13-dekabr kúni qabıl etilgen Ministrler Kabinetiniӊ «Nókis qalasınıӊ bas rejesin tastıyıqlaw haqqında»ǵı qararında sóz etiledi.
Hújjetke bola, Nókis qalasın kompleksli rawajlandırıw, qurılıs jumısların rejelestiriw, olardıӊ sapası hám dárejesin arttırıw, qalanıӊ hákimshilik-rejelestiriw kórinisin hám infrastrukturasın jáne de jaqsılaw maqset etilgen. Qarar menen qalanıӊ bas rejesi joybarınıӊ tiykarǵı sheshimleri hám texnikalıq-ekonomikalıq kórsetkishleri tastıyıqlanbaqta. 2040-jılǵa shekem Nókis qalası Nókis rayonı aymaǵı esabınan 876 gektarǵa keӊeyiwi názerde tutılǵan. Bunnan tısqarı, xalıqtıӊ sanı 312,4 mıӊnan 400 mıӊ adamǵa kóbeyedi, qalanıӊ maydanı 13,4 mıӊ gektarǵa jetedi. Mektepke shekemgi bilimlendiriw mákemeleriniӊ sanı eki esege kóbeyedi hám 20,8 mıӊdı quraydı, emlewxanalardaǵı orınlar 3,3 mıӊnan 9,8 mıӊǵa shekem artadı. Turmıslıq xızmet kórsetiw kárxanaları 437den 2,8 mıӊ jumıs orınlarına kóbeyedi. Magistral kóshelerdiӊ ulıwma uzınlıǵı 278 kilometrdi quraydı (házirgi waqıtta 90 kilometr).
Jaӊa bas rejege muwapıq, qalada eki hákimshilik oray shólkemlestiriledi. Birinshi hákimshilik oray – qalanıӊ búgingi kúndegi hákimshilik orayı esaplanıp, Islam Karimov, Ámir Temur hám M.Jumanazarov kósheleriniӊ kesilispesi bolıp esaplanadı. Bul oray saqlap qalınadı. Onda jaylasqan Savickiy muzeyi, Eslew maydanı, miymanxanalar, ІT-park, dem alıw baǵı hám basqa hákimshilik hám xojalıq imaratların qurıw hám qayta oӊlaw, eski imarat hám obyektlerdiӊ ornına jaӊa hám zamanagóy kóp qabatlı imaratlardı jaylastırıw usınısı kirgizilgen.
Az qabatlı turaq jaylardıӊ ornına kóp qabatlı zamanagóy turaq jay massivlerin jaylastırıw rejelestirilgen. E.Alakóz, M.Jumanazarov, A.Dosnazarov kósheleriniӊ boyında kóp qabatlı turaq jaylardı jaylastırıw belgilengen. Bas rejede usı turaq jaylardıӊ birinshi qabatlarında xalıqqa sociallıq xızmet kórsetiw obyektlerin jaylastırıw usınıs etiledi.
Piyadalar jolları, dem alıw maydanshaları, jasıl maydanlardı shólkemlestiriw, birden-bir sistema arqalı baylanıstırıw hám xalıqqa qolaylı sharayat jaratıw rejelestirilgen. Qalanıӊ bar hám qosılıp atırǵan aymaqlarınan aqılǵa uǵras paydalanıw, hár bir massivtiӊ hákimshilik oraylarında zamanagóy imaratlardı Qaraqalpaqstan Respublikası Nókis qalasınıӊ ózine tán arxitekturalıq-mádeniy usılın inabatqa alınǵan halda, xalıqtıӊ turmıs tárizin qolaylastırıw arqalı xalıqtı jaӊa jumıs orınları menen támiyinlewge erisiledi.
Ekinshi hákimshilik oray – qalanıӊ qubla-batıs bólegindegi Nókis rayonına shıǵatuǵın kósheler hám joybarlıq kósheler kislispesinde jaylastırıladı. Nukus city’diӊ usı orayları kishi hám orta biznesti, bank filialları, turaq jay hám djámiyetlik imaratlardıӊ biznesti basqarıw menen baylanıslı obyektlerdi birlestiredi hám 7 qabattan 16 qabatqa shekemgi obyektler qurıladı.
Hár bir shólkemlestirilgen turaq jay massivi (máhálle, kishi rayon) xalıqqa xızmetler kórsetiw kompleksi menen támiyinlengen. Hár bir kishi rayonda xızmet kórsetiw normaları hám onda jasaytuǵın xalıqtıӊ sanın esapqa alǵan halda mektepler, balalar baqshaları, máhálle gúzarları, kishi maydanshalar, jasıl maydanlar hám parkler shólkemlestiriliwi rejelestirilgen.
Hákimshilik hám aymaqlıq oraylarǵa alıp baratuǵın jollar boylarındaǵı imaratlardıӊ ornına zamanagóy joybarlar tiykarında basqıshpa-basqısh qayta qurıw jumısları ámelge asırıladı hám nátiyjede qalanıӊ kórinisi jáne de jaqsılanıp, kósheler abat bolıwı hám xalıq ushın qolaylı sharayatlar jaratıwǵa erisiledi.
Turaq jay aymaqları. Nókis qalasınıӊ joybarlıq shegarası arqada Nókis rayonı hám «Doslıq» kanalı aӊǵarı boylap, shıǵısta kishi aylanba jolına shekem, batısta Ámiwdáryaǵa shekem hám qubla tárepten sanaat aymaqlarına shekem belgilengen. Shıǵıs hám qubla baǵdarlar qumlar menen qaplanǵanı sebepli jaӊa turaq jay massivleri tiykarınan arqa-batıs tárepte jaylasadı. Qalaǵa qosılıp atırǵan aymaqlar 876,0 gektar, esabat dáwirinde bul kórsetkish 13 383,0 gektarǵa jetedi. Kóshelerde transport qatnawın jaqsılaw ushın keӊeytiw, kóshe boyındaǵı jeke tártiptegi turaq jaylardıӊ ornına renovaciya baǵdarlaması sheӊberinde zamanagóy hám kóp qabatlı turaq jay massivleri jaylastırıladı.
Qaraqalpaqstan xabar agentligi