Búgin Taxtakópir rayonındaǵı Qaratereń kóli boyında jańadan qurılǵan, hesh jerde uqsası joq milliy kolorittegi «Qaratereń» etno-turistlik kompleksiniń ashılıw saltanatı ótkerildi.
Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, jańa turistlik komplekstiӊ ashılıwı menen jıynalǵanlardı qutlıqladı. Ótkerilgen ilajda Qaraqalpaqstan Respublikası Joqarǵı Keńesi Prezidiumınıń qararına muwapıq, elimizdi hár tárepleme rawajlandırıw hám xalqımızdıń abadan turmısın támiyinlew jolındaǵı pidákerlik miynetleri, jámiyetimizde milletleraralıq doslıq hám tatıwlıqtı bekkemlew, jas áwladtı Watandı súyiwshilik hám ǵárezsizlik ideyalarına sadıqlıq ruwxında tárbiyalaw hám jámiyetlik-siyasiy turmıstaǵı belsendiligi ushın bir topar watanlaslarımız húrmetli ataqlar hám kókirek belgileri, estelik sawǵaları menen sıylıqlandı.
Maǵlıwmat ushın, Qaraqalpaqstan Respublikasınıӊ eӊ shetki aymaqlarınıӊ biri Taxtakópir rayonında barlıq tarawlarda keӊ kólemli reformalar ámelge asırılıp, rayonnıӊ ekonomikalıq-sociallıq infrastrukturasın jaqsılaw, xalıqtıӊ abadan turmısta jasawı ushın zárúr sharayatlar jaratılmaqta. Atap aytqanda, mámleketimiz basshısınıń tapsırmasına bola Taxtakópir rayonı «Beltaw» APJ da joqarı texnologiyalı irrigaciya sisteması qurıldı. Sonday-aq, Aralboyı regionında infrastruktura jaǵdayın jáne de jaqsılaw, turizm potencialın arttırıw hám xalıqtıӊ bántligin támiyinlew maqsetinde bul máhálle aymaǵında «Qaratereӊ» ekoturizm kompleksi qurıldı. Ótkerilip atırǵan bul ilajlar da respublikamızdıӊ alıs aymaqlarınan biri bolǵan Taxtakópir rayonına jergilikli hám sırt elli turistlerdi shaqırıw, xalıqlar doslıǵın bekkemlew baǵdarında ámelge asırılıp atırǵan jumıslardıӊ dawamı bolıp esaplanadı.
Qaraqalpaqstan xabar agentligi