Ózbekstan Еkologiyalıq partiyasınan Oliy Majlis Nızamshılıq palatası hám jergilikli Keńeslerdiń deputatlıǵına kórsetilgen talabanlardıń jaslar menen ushırasıwınıń gezektegisi Samarqand mámleketlik Veterinariya medicinası, sharwashılıq hám biotexnologiyalar universitetiniń Nókis filialında bolıp ótti.
Ushırasıwda Ózbekstan Еkologiyalıq partiyasınan Ózbekstan Respublikası Oliy Majlisi Nızamshılıq palatası deputatlıǵına talaban S.Utemuratova, Xalıq deputatları Nókis qalalıq Keńesi deputatlıǵına talaban O.Saparova, Ózbekstan Еkologiyalıq partiyası Qaraqalpaqstan Respublikası partiya shólkemi Keńesi bas qánigesi A.Abdiraxmanova, Nókis qalalıq partiya shólkemi Keńesiniń baslıǵı A.Ismaylovalar shıǵıp sóylep, saylawaldı baǵdarlamaları tuwralı maǵlıwmatlar berildi.
Atap ótilgenindey, Ózbekstan Еkologiyalıq partiyası “Tábiyat ushın birleseyik!” súreni astında tábiyattıń búgingi shaqırıǵına qulaq tutıwǵa shaqıradı. Bársheni salamat ortalıqqa iye keleshekke, kóz aldımızda kórinip turǵan sistemalı ekologiyalıq mashqalalardı sheshiwge baǵdarlaydı.
Ashıq sáwbetlesiw formasında ótken ushırasıwda talabanlar qatnasıwshılarǵa partiyanıń saylawaldı baǵdarlamasındaǵı eń áhmiyetli baǵdarlar, xalıq mápleri kózqarasınan islep shıǵılǵan ideyaları hám usınısları tuwralı túsinik berdi.
Atap aytqanda, saylawlarda dáslepki márte dawıs beriwde qatnasatuǵın jaslardıń huqıqları menen minnetlemeleri boyınsha maǵlıwmatlar berilip, jámiyette ekologiyalıq mádeniyattı kóteriw, ósip kiyatırǵan keleshek áwladtıń ekologiyalıq bilimin arttırıw, ekologiyalıq bilimlendiriw hám tárbiya procesin nátiyjeli shólkemlestiriw maqsetinde “Xalıqtıń ekologiyalıq mádeniyatın kóteriw koncepsiyası” jáne onı ámelge asırıw boyınsha baǵdarlama qabıl etiw, suw resurslarınan nátiyjeli paydalanıw boyınsha milliy baǵdarlamanı qabıl etiw, ósimlik hám haywanat dúnyasın qorǵawdı kúsheytiw, atmosferaǵa shıǵarılatuǵın zıyanlı gazlerdi azaytıw hám járiymalardı kúsheytiw sıyaqlı oǵada áhmiyetli wazıypalar belgilengen.
Ushırasıwda jas saylawshılarǵa partiya jumısları hám baslamalarına tiyisli úgit-násiyatlaw quralları, jańa baǵdarlama orın alǵan kitapshalar, flayerler hám talabannıń flayerleri tarqatılıp, jaslar ózlerin qızıqtırǵan sorawlarına juwap aldı.
Qaraqalpaqstan xabar agentligi.