Qaraqalpaqstan Respublikasınıń jámiyetlik-siyasiy turmısında eń ullı sánelerdiń biri – Qaraqalpaqstan Respublikası Konstituciyası qabıl etilgen kún barlıq orınlarda joqarı kóterińkilik penen belgilenbekte. Bıyıl onıń qabıl etilgenine 25 jıl toldı. Usı sánege baylanıslı ótkerilip atırǵan mádeniy-aǵartıwshılıq ilajlarda tiykarǵı Nızamımız xalıq mápi ushın xızmet etetuǵını atap ótilmekte.
Sebebi, Konstituciya demokratiyalıq huqıqıy mámleket qurıwǵa, tınıshlıqtı-tatıwlıqtı támiyinlewdey iygilikli maqsetlerge xızmet etpekte. Sonıń menen birge, Konstituciyamız xalqımızdı birlestiriwshi, milletleraralıq doslıqtı bekkemlewshi, ullı dóretiwshilik islerge ruwxlandırıwshı huqıqıy hújjet bolıp esaplanadı.
Ózinde insanıylıq ideyalardı jámlegen, insan huqıqların hám hújdan erkinligin támiyinlewshi bul nızamnıń hár bir statyası insan mápi ushın xızmet etiwi menen áhmiyetli esaplanadı. Búgingi kúnde usı konstituciyalıq normalardıń ámelde orınlanıwın támiyinlewge, xalqımızdıń turmıs abadanlıǵın arttırıwǵa qaratılǵan bir qatar normativlik-huqıqıy hújjetler qabıl etildi.
Konstituciya – mámleketlik hákimiyattıń bóliniwi tiykarında ámelge asırılıwın belgiledi, pikirlerdiń kóp túrliligine hám kóp partiyalılıqqa tiykar jarattı. Mámleket siyasatındaǵı túpkilikli ózgerislerdi ózinde sáwlelendirgen usı Konstituciyada bazar qatnasıqlarına tiykarlanǵan jámiyettiń ekonomikalıq negizi bolǵan jeke múlkshilik, erkin isbilermenlik sıyaqlı institutlar bekkem tiykarǵa iye boldı.
Usı jıl 9-aprel kúni paytaxtımızdaǵı Berdaq atındaǵı Qaraqalpaq mámleketlik akademiyalıq muzıkalı teatrında usı bayramǵa baǵıshlanǵan saltanatlı májilis hám bayram koncerti bolıp ótti.Ilajǵa Qaraqalpaqstan Respublikası Joqarǵı Keńesi hám Ministrler Keńesiniń baslıqları, respublika húkimetiniń aǵzaları, ministrlikler menen vedomstvolardıń basshıları, joqarı bilimlendiriw mákemeleriniń professor-oqıtıwshıları, student-jaslar, keń jámiyetshilik wákilleri qatnastı.
Ózbekstan hám Qaraqalpaqstan Respublikalarınıń mámleketlik gimnleri atqarıldı.
Qaraqalpaqstan Respublikası Joqarǵı Keńesiniń komitet baslıǵı Saǵındıq Turmanov shıǵıp sóylep, jıynalǵanlardı Qaraqalpaqstan Respublikası Joqarǵı Keńesi hám Ministrler Keńesi atınan Qaraqalpaqstan Respublikası Konstituciyası qabıl etilgenliginiń 25 jıllıǵı menen qızǵın qutlıqlap, bayramǵa arnap bayanat jasadı.
Ilajda Berdaq atındaǵı Qaraqalpaq mámleketlik universitetiniń studenti Yulduz Tursunbaeva, shayır Jumaniyaz Óteniyazov qutlıqlaw sóz sóyledi.
Saltanatlı májilis qatnasıwshılarına elimizge belgili kórkem óner sheberleriniń atqarıwındaǵı «Konstituciya – ǵárezsizligimiz, baxtımız tiykarı» atlı koncert baǵdarlaması qoyıp berildi.
– Konstituciya biz jaslardıń keleshegimizdi bekkem qurıwımızǵa úlken fundament bolıp, onda jazılǵan hár bir sóz biz ushın oǵada qádirli. Búgin men respublikamız jaslarınıń atınan biz ushın jaratılǵan imkaniyatlardan utımlı paydalanıp, Prezidentimizdiń, xalqımızdıń isenimin aqlap, ózimizdiń bar kúsh-jigerimizdi elimizdiń rawajlanıwı ushın jumsawǵa hám dúnya jámiyetshiligi arasında elimizdiń abıroyın ele de arttırıwǵa bárqulla tayarmız, dep bekkem isenim menen ayta alaman,-deydi Yu.Tursunbaeva.
Qaraqalpaqstan Respublikası Konstituciyası kúnine baǵıshlanǵan bayram ilajları barlıq qala hám rayonlarda, joqarı hám orta arnawlı oqıw orınlarında, miynet jámáátlerinde keń túrde belgilenip ótti.
Á.Jiemuratov,
Qaraqalpaqstan xabar agentliginiń xabarshısı.