Paytaxtımızda 13-aprel kúni Ózbekstan kóleminde 8-10-klass oqıwshıları arasında qábiletli oqıwshılardıń innovaciyalıq olimpiadacı baslandı. Úsh kún dawam etetuǵın olimpiadada Samarqand wálayatınan basqa barlıq wálayatlardan jámi 28 oqıwshı bellesiwi kútilmekte.
«Progress» rawajlandırıw hám bilimlendiriw orayında olimpiadanıń ashılıw máresimi bolıp ótti. Hár bir wálayat ózleriniń milliy shıǵıwları menen qatnasqan bul salatanatlı ilaj óz-ara doslıq qatnasıqların bekkemlew maqsetinde shólkemlestirilgen treningler menen dawam etti. Trening Respublikalıq balalar kitapxanasında ótkerildi.
Sonday-aq, olimpiada procesi 14-aprel kúni I.Yusupov atındaǵı mámleketlik qánigelestirilgen mektep internatında dawam etti. Búgin olar I.V.Savickiy atındaǵı qaraqalpaq mámleketlik kórkem óner muzeyine sayaxat etedi hám ilajlar «Progress» rawajlandırıw hám bilimlendiriw orayında olimpiada jeńimpazların sıylıqlaw máresimi menen juwmaqlanıwı názerde tutılmaqta.
Esletip ótemiz, bul olimpiadada birinshi orınǵa sazawar bolǵan jeńimpaz oqıwshı Xalıqaralıq olimpiadalarǵa qatnasıw imkaniyatına iye boladı.
Qaraqalpaqstan xabar agentligi