Túrkmenstan Prezidenti Gurbanguli Berdimuxamedovtıń Ózbekstanǵa mámleketlik saparı sheńberinde Tashkentte Túrkmenstan milliy kórgizbesi bolıp ótpekte. Onda qońsılas mámleketlerdiń jetekshi kárxanaları, kompaniyaları hám shólkemleri, iri isbilermenlik subektleri qatnasıp, milliy ónimlerdi, ekonomika tarawındaǵı aldınǵı texnologiyalardı, xızmetlerdi kórsetpekte.
Ózbekstan Respublikası Prezidenti Shavkat Mirziyoev Túrkmenstan milliy kórgizbesi qatnasıwshılarına hám miymanlarına qutlıqlaw jolladı.
Kórgizbeniń ashılıw máresiminde Prezidenttiń qutlıqlawın Ózbekstan Respublikası Bas ministriniń orınbasarı N.Atajanov oqıp esittirdi.
Qutlıqlawda Ózbekstan hám Túrkmenstan – strategiyalıq sherikler ekeni, xalıqlarımızdı kóp ásirlik doslıq hám jaqın qońsıshılıq baylanısları, ulıwma tariyx, din hám til, mádeniyat, úrp-ádet hám dástúrlerdiń uqsaslıǵı baylanıstırıp kiyatırǵanı, búgingi kúnde ellerimizdiń biznes toparları arasındaǵı izbe-iz isbilermenlik baylanısları jáne aymaqlararalıq bekkemlenip atırǵan birge islesiw sheńberinde keń perspektivalar ashılıp atırǵanı atap ótilgen.
Túrkmenstan Respublikası sırtqı ekonomikalıq baylanıslar hám sawda ministri D.Wrozmurodov túrkmenstanlı isbilermenler ushın Ózbekstan áhmiyetli sawda-ekonomikalıq aymaq ekeni, Ullı jipek jolınıń sawda-satıq rawajlanǵan mánzilinde jaylasqan ellerimiz isbilermenleriniń birge islesiwiniń bekkemlenip atırǵanı bolsa, teńdey paydalı rawajlanıwda ayrıqsha áhmiyetke iye ekenin atap ótti.
Ózbekstan – Túrkmenstan birge islesiw qatnasıqları jańa basqıshta bekkemlenip barmaqta. Bul baǵdarda eki mámleket basshılarınıń joqarı dárejedegi ushırasıwları dawamında erisilgen kelisimlerdiń birgelikte ámelge asırılıp atırǵanı sheshiwshi áhmiyetke iye.
Ásirese, keyingi jıllarda óz-ara sawda kólemi sezilerli arttı. Túrli ekonomikalıq tarmaqlarda kooperaciyalıq baylanıslar keńeydi. Bunnan bir ay burın Ashxabadta Túrkmenstan Prezidentiniń tikkeley qollap-quwatlawı menen ótkerilgen Ózbekstan milliy sanaat kórgizbesi hám onda erisilgen kóp qırlı kelisimler pikirimizdiń dálili bolıp tabıladı.
Túrkmenstan milliy kórgizbesinde neft hám ximiya, toqımashılıq, medicina sanaatı, awıl xojalıǵı hám azıq-awqat ónimleri, qurılıs tovarları, transport hám logistika, sport hám turizm, ilimiy-texnika, bilimlendiriw tarawındaǵı jetiskenlikler, xızmetler kórsetilmekte. Túrkmen gilemleri, jumıstı úyge alıp islew, balıqshılıq sanaatı, dúnyaǵa belgili aqalteke atları násilshiligi izertlewleri úlken qızıǵıwshılıq oyatpaqta.
Túrkmenstanda balıqshılıq sanaatınıń rawajlanıwınıń tiykarǵı dáregi Kaspiy teńizi bolıp tabıladı. Búgin mámlekettiń suw saqlaǵıshlarında balıqtıń 50 den aslam túrin ushıratıw múmkin.
– Túrkmenstanda balıq hám teńiz ónimlerin qayta islew sanaatı jaqsı rawajlanǵan. Isbilermenlerimiz balıq hám balıq ónimlerin qońsılas respublikalarǵa eksport etedi, – deydi Túrkmenstan Balıq sanaatı mámleketlik komitetiniń bólim baslıǵı Gayir Gayipov. – Kórgizbege jeke isbilermenlerimiz de qatnaspaqta. Olar Ózbekstan bazarın úyrenip, birge islesiw tileginde kelgen. Atap aytqanda, ózbekstanlı kásipleslerimizdiń balıqshılıq tarawında zárúr shiyki zat ónimleri, qadaqlaw qurılmaları, jańa texnologiyalar óndiris tájiriybesin úyreniwdi rejelestirgenbiz.
Prezident Gurbanguli Berdumuhamedovtıń usınısı menen 2018-jıl elimizde «Túrkmenstan – Ullı jipek jolınıń júregi» degen súren menen ótpekte. Bunda mámlekette turizmdi rawajlandırıwǵa da tiykarǵı itibar qaratılmaqta. Kórgizbede Túrkmenstan Turizm mámleketlik komiteti wákilleri qatnaspaqta.
– Elimizde turizmdi rawajlandırıw boyınsha keń kólemli jumıslar ámelge asırılmaqta. Bizde ájayıp túristlik mánziller bar. Kaspiy jaǵasındaǵı «Avaza» milliy turistlik zonasında 200 den aslam miymanxana, ájayıp dem alıw mánzilleri turistlerdiń xızmetinde, – deydi Túrkmenstan Turizm mámleketlik komitetiniń bólim baslıǵı Islam Avezov. – Túrkmenstan hám Ózbekstan arasında turizmdi rawajlandırıwda uzaq jıllardan berli birge islesip kelemiz. Sońǵı jıllarda bul baǵdarda júdá úlken nátiyjelerge eristik. Búgingi kúnde Evropa, Shıǵıs Aziya hám basqa da ellerden Ullı jipek jolı baǵdarında sayaxatqa shıqqan turistlerdiń Túrkmenstan arqalı Xorezm, Buxara wálayatındaǵı áyyemgi qalalarǵa jáne Ózbekstan arqalı Túrkmenstanǵa sapar etiwi ámelge asırılıp kelinbekte. Búgin bul baǵdardaǵı birge islesiw baylanısların bunnan bılay da bekkemlewge isenemiz.
Túrkmenstan milliy kórgizbesiniń juwmaǵında ekonomikalıq baylanıslar bunnan bılay da rawajlanıwı, eki eldiń isbilermenleri arasında óz-ara paydalı kelisimlerge erisiliwi kútilmekte. Bul tárepler ázeliy dos xalıqlarımız arasında mehir baylanısların barǵan sayın bekkemleydi.
Ulıǵbek ASROROV,
ÓzAnıń xapbarshısı