Bıyılǵı jılı respublikamızda Vetnam mámleketi menen balıqshılıq tarawındaǵı birge islesiw sheńberinde eki zavodtı iske túsiriw rejelestirilmekte.
Usı jıldıń 28-fevral hám 6-mart kúnleri aralıǵında respublikamız delegaciyasınıń Vetnam Respublikasına saparı waqtında «Qaraqalpaqbalıqsanaat» juwapkershiligi sheklengen jámiyeti, Ózbekstan Respublikası Salıgershilikti rawajlandırıw ilim-izertlew institutı hám usı mámlekettiń 1-sanlı akvakultura ilim-izertlew institutı arasında tábiyiy hám jasalma kóllerde intensiv jáne qápes usıllarında, salı maydanlarında balıq jetistiriwdi rawajlandırıw, Aral teńizi ultanındaǵı artemiya cistasın qayta islew, onı jasalma usılda kóbeytiw boyınsha eki jıllıq memorandumǵa qol qoyıldı. Jumısshı topar aǵzaları Vetnam awıl xojalıǵı hám awıllardı rawajlandırıw ministrliginde, awıl xojalıǵı ilim-izertlew institutında, Xao Bin provinciyasındaǵı suw saqlaǵıshta intensiv usılda balıq jetistiretuǵın fermer xojalıqlarında, 1-sanlı akvakultura ilim-izertlew institutında bolıp, ilimpazlar, qánigeler, fermerler menen ushırastı. Aldaǵı waqıtları birge islesiw boyınsha paydalı pikir alısıwlar boldı.
«Qaraqalpaqbalıqsanaat» juwapkershiligi sheklengen jámiyeti basshılarınıń atap ótkenindey, memorandumǵa hám sapar dawamında basqa da investorlar menen erisilgen kelisimlerge muwapıq, usı mámleket wákilleri aprel-iyun ayları aralıǵında respublikamızda bolıp, tábiyiy hám jasalma suw basseynlerinde, jabıq hám aylanba sistemasında, intensiv háwizde, qápes hám salı maydanlarında balıq jetistiriw boyınsha aldıńǵı tájiriybeleri menen ortaqlasadı.
Vetnamlı qánigeler menen birgelikte qurılatuǵın zavodtıń birinshisinde saatına 10 tonna aralas jem islep shıǵarılsa, ekinshisinde artemiya cistası qayta islenip, onnan tayar ónim islep shıǵarıladı. Sonı ayrıqsha atap ótiw kerek, bul ónim farmacevtika, kosmetologiya, biologiyalıq aktiv qosımtalarda (BAD) keńnen qollanılsa, qaldıǵı aralas jemge aralastırılsa, onıń juǵımlılıǵı artadı.
D.ABIBULLAEV,
Qaraqalpaqstan xabar agentliginiń xabarshısı.