Qaraqalpaqstan Respublikası Joqarǵı Keńesi janındaǵı Puqaralardıń kepillengen miynet huqıqların támiyinlew máseleleri boyınsha aymaqlıq komissiyası hám Qaraqalpaqstan kásiplik awqamları shólkemleri birlespesi Keńesiniń shólkemlestiriwinde usı atamada «28-aprel – Dúnya júzilik miynetti qorǵaw kúni» múnásibeti menen dógerek sáwbeti bolıp ótti.
Oǵan Qaraqalpaqstan Respublikası Joqarǵı Keńesiniń deputatları, huqıq qorǵaw uyımlarınıń, tiyisli ministrlikler menen vedomstvolardıń wákilleri, taraw qánigeleri qatnastı.
Ilajdı Qaraqalpaqstan Respublikası Joqarǵı Keńesiniń komitet baslıǵı, Qaraqalpaqstan Respublikası Joqarǵı Keńesi janındaǵı Puqaralardıń kepillengen miynet huqıqların támiyinlew máseleleri boyınsha aymaqlıq komissiyasınıń baslıǵı D.Qurbaniyazov alıp bardı.
Qaraqalpaqstan Respublikası Joqarǵı Keńesiniń deputatı, Qaraqalpaqstan Respublikası Joqarǵı Keńesi janındaǵı Puqaralardıń kepillengen miynet huqıqların támiyinlew máseleleri boyınsha aymaqlıq komissiyasınıń aǵzası Almagúl Bayrıeva, Qaraqalpaqstan Respublikası Bántlik hám miynet qatnasıqları ministrliginiń mámleketlik miynet huqıq inspekciyasınıń baslıǵı Javlonbek Qurbanbaev hám basqalar shıǵıp sóylep, elimizde miynetti qorǵaw, májbúriy miynetke qarsı gúresiw boyınsha qabıl etilgen nızamlar, qararlar, normativlik-huqıqıy hújjetler haqqında keń túrde túsinik berip, ámelge asırılıp atırǵan jumıslar tuwralı maǵlıwmatlar berdi.
Atap ótilgenindey, biziń elimizde miynet tarawında milliy nızamshılıq bazası jetkilikli dárejede qáliplesken bolıp, sonıń ishinde májbúriy miynettiń aldın alıw hám onıń hár qanday kórinisin boldırmawǵa qaratılǵan ilajlarǵa huqıqıy tiykar bolıp xızmet etetuǵın bir qatar nızamnan kelip shıǵatuǵın hújjetler qabıl etilgen. Bul hújjetler búgingi kúnde usı tarawdaǵı múnásibetlerdi tártipke salıp kelmekte.
Hár bir puqaranıń óz qálewi menen tiyisli jumıs penen támiyinleniwi kelesi waqıtta qanday da bir májbúriy miynettiń hár qanday kórinisleriniń aldın alıwǵa óziniń unamlı tásirin tiygizedi. Májbúriy miynetke qarsı gúresiwdi ámelge asırıwda, álbette, puqaralardıń taraw boyınsha bilimleri hám eń sońǵı jámiyetlik huqıqıy waqıyalardan xabardar bolıwı ayrıqsha áhmiyetke iye.
Xalıqaralıq miynet shólkemi menen birgelikte Ózbekstanda 2017-2020-jıllar ushın múnásip miynet boyınsha mámleketlik baǵdarlamanıń izbe-iz ámelge asırılıp atırǵanlıǵı úlken áhmiyetke iye. Ózbekstan Respublikası tárepinen balalardıń miynetinen paydalanıwǵa hám májbúriy miynetke jol qoymaw boyınsha barlıq ilajlar kórilmekte.
Ózbekstanda balalar miyneti hám májbúriy miynet máseleleri boyınsha Muwapıqlastırıwshı Keńes dúzilgen bolıp, onıń jumısınıń tiykarǵı maqseti, balalar miynetiniń eń awır túrlerin saplastırıw baǵdarındaǵı milliy siyasattı ámelge asırıwǵa qaratılǵan ilajlar hám mámleketlik uyımlar menen puqaralıq jámiyeti institutlarınıń jumısların muwapıqlastırıw hám usı baǵdardaǵı jumıslardı jetilistiriwden ibarat.
2018-jıldıń birinshi shereginde miynet hám xalıqtıń bántligi haqqındaǵı nızamshılıq talaplarınıń orınlanıwı boyınsha ótkerilgen tekseriwler nátiyjesine bola, miynet haqqındaǵı nızam hújjetlerin buzǵanı, miynetke hákimshilik tártipte májbúrlegeni, bos jumıs orınların jasırǵanı hám basqa da huqıqbuzarlıqlarǵa jol qoyǵanı ushın respublikamız boyınsha jámi 159 lawazımlı shaxsqa 70 million 446 mıń 160 sum járiyma salınǵan.
Ilajda puqaralardıń kepillengen miynet huqıqların támiyinlew, májbúriy miynettiń aldın alıw, konstituciyada belgilengen miynet huqıqların buzǵanlıǵı ushın juwapkershilik, miynet sharayatları, kásiplik kesellikler, miynet jaraqatlarınıń kelip shıǵıwı hám kewilsiz aqıbetlerdiń aldın alıw, óndirislik hám óndirislik emes tarawlardaǵı jumıslardı qáwip-qátersiz alıp barıw usılları sıyaqlı máseleleler keńnen túsindirilip, pikir-usınıslar bildirildi.
– Dógerek sáwbetiniń tiykarǵı maqseti,-deydi Qaraqalpaqstan kásiplik awqamları shólkemleri birlespesi Keńesi baslıǵınıń orınbasarı Muratbay Daniyarov. – Qaraqalpaqstan Respublikası Ministrler Keńesi, Qaraqalpaqstan kásiplik awqamları shólkemleri birlespesi Keńesi, Sawda-sanaat palatası arasındaǵı 2017-2019-jıllar ushın dúzilgen Aymaqlıq Bas kelisim tiykarında sociallıq sheriklesler menen óz-ara birge islesiwdiń forma hám metodların jetilistiriw, xızmetkerlerge qáwipsiz miynet sharayatların jaratıw, óndiristegi baxıtsız hádiyselerdiń aldın alıw, usı baǵdardaǵı jumıslardı kúsheytiwde jumıs beriwshiler menen kásiplik awqamları arasındaǵı birge islesiwdi rawajlandırıw bolıp esaplanadı. Ótkerilgen dógerek sáwbetinen kelip shıqqan halda búgingi kúnde respublikamızda qáwipsiz miynet sharayatın jaratıw ushın kárxanalardı ekonomikalıq jaqtan bekkemlew hám jas qánigeler menen tolıqtırıp barıw Aymaqlıq kelisimde kórsetilgenindey sociallıq-ekonomikalıq rawajlanıw nátiyjelerine erisiw múmkinshiligin beredi.
Ilaj qatnasıwshıları qánigelerden ózlerin qızıqtırǵan sorawlarǵa juwap aldı.
Ádilbay Jiyemuratov,
Qaraqalpaqstan xabar agentliginiń xabarshısı.
(M.Habibullaevtıń túsirgen súwretleri)