Usı jıldıń 5-aprel kúni Ózbekstan Respublikası Prezidentiniń «Joqarı bilimlendiriw hám ilimiy izertlew mákemeleri xızmetkerleriniń miynetine haqı tólew sistemasın jetilistiriw ilajları haqqında»ǵı qararı qabıl etildi. Bul haqqında Ádillik ministrliginiń «Huquqiy axborot» kanalı xabar bermekte.
Qararǵa muwapıq, 2018-jıl 1-sentyabrden baslap:
– joqarı bilimlendiriw mákemeleriniń basshı xızmetkerleri hám professor-oqıtıwshılarınıń – bazalıq lawazımlıq miynet haqısınıń muǵdarı ortasha 25 procentke hám stajyor-oqıtıwshı jáne ilim doktorı ilimiy dárejesine iye bolǵan professor miynet haqısınıń muǵdarı arasındaǵı parq eki esege shekem;
– ilimiy izertlew mákemeleri ilimiy xızmetkerleriniń – bazalıq lawazımlıq miynet haqısınıń muǵdarı ortasha 25 procentke hám stajyor-izertlewshi jáne ilim doktorı ilimiy dárejesine, sonday-aq, professor ilimiy dárejesine iye bolǵan úlken ilimiy xızmetker miynet haqısınıń muǵdarı arasındaǵı parq eki esege shekem kóbeytildi.
Sonday-aq, 2018-jıl 1-sentyabrden baslap:
– bazalıq doktoranturada oqıp atırǵan shaxslarǵa – kishi ilimiy xızmetkerdiń lawazımlıq miynet haqısı bazalıq muǵdarına teńlestirilgen stipendiyalar;
– doktoranturada oqıp atırǵan shaxslarǵa – ilim kandidatı ilimiy dárejesine yamasa ilimiy ataqqa iye bolǵan jetekshi ilimiy xızmetkerdiń lawazımlıq miynet haqısınıń bazalıq muǵdarına teńlestirilgen stipendiyalar tólenedi.
Qaraqalpaqstan xabar agentligi