Ózbekstan Respublikası Prezidenti Shavkat Mirziyoev 26-mart kúni «Tınıshlıq procesinde, qáwipsizlik tarawında birge islesiw hám regionallıq sheriklik» temasında Awǵanstan boyınsha joqarı dárejedegi Tashkent xalıqaralıq konferenciyasında qatnasıw ushın elimizge kelgen AQShtıń abıroylı delegaciyasınıń basshısı, AQSh Mámleketlik xatkeriniń siyasiy máseleler boyınsha orınbasarı Tomas Shennondı qabıl etti.
Mámleketimiz basshısı miymandı qutlıqlap, birgeliktegi is-háreketler Ózbekstan-AQSh qatnasıqların rawajlandırıwǵa jańa pát baǵıshlaǵanın ayrıqsha atap ótti. Joqarı dárejedegi eki tárepleme sóylesiwler Ózbekstan menen AQSh arasındaǵı strategiyalıq sheriklikti bekkemlewge xızmet etip, onı ámeliy mazmun menen bayıtpaqta.
Ellerimiz arasında jolǵa qoyılǵan turaqlı siyasiy sóylesiwge joqarı baha berildi. Sawda, investiciya hám joqarı texnologiyalar tarawında qospa joybarlardı ámelge asırıwda AQShtıń jetekshi kompaniyaları hám bankleri menen óz-ara paydalı birge islesiwdi keńeytiw áhmiyetli ekneligi atap ótildi.
Awǵanstan húkimetiniń elde tınıshlıqtı hám turaqlılıqtı ornatıw, regionallıq ekonomikalıq birge islesiw processlerine qosılıw boyınsha is-háreketlerdi eki táreptiń de qollap-quwatlaytuǵını atap ótildi.
Ózbekstan Prezidenti Shavkat Mirziyoev Awǵanstan boyınsha Tashkent konferenciyasın ótkeriw haqqındaǵı baslamanı qollap-quwatlaǵanı hám onıń ishinde AQShtıń abıroylı delegaciyası qatnasıp atırǵanı ushın Prezident Donald Trampqa minnetdarshılıq bildirdi.
AQSh Mámleketlik xatkeriniń orınbasarı Tomas Shennon usı ánjumanda qatnasıwǵa mirát etkeni ushın Prezident Shavkat Mirziyoevqa shın júrekten minnetdarshılıq bildirdi. Bul áhmiyetli xalıqaralıq ilajdıń óz waqtında ótkerilip atırǵanı hám áhmiyetliligi ayrıqsha atap ótildi.
AQSh diplomatı elimizde mámlketlik basqarıw, puqaralıq jámiyeti hám ekonomika tarawlarında jańa basqıshta ámelge asırılıp atırǵan reformalardı joqarı bahaladı.
Óz eliniń basshıları atınan AQSh mámleketlerimiz arasındaǵı eki tárepleme keń kólemli birge islesiwdi bunnan bılay da keńeytiw hám strategiyalıq sheriklikti bekkemlewge tayar ekenin atap ótti.
ÓzA