Nawrız regionımız xalıqlarınıń áyyemgi hám ulıwmalıq bayramı bolıp esaplanadı. Onıń mánisinde doslıq, tatıwlıq, keńpeyillik, jaqsı qońsıshılıq sıyaqlı adamgershilikke tán pazıyletler óz kórinisin tapqan. Xalqımız ázelden bul bayramdı dosları, jaqınları tuwısqanları menen birge belgilegen.
Ótken jılı Nawrız kúnleri Ózbekstan Respublikası Prezidenti Shavkat Miriziyoev Qazaqstan Respublikasına mámleketlik sapar menen barǵan edi.
Bıyıl Qazaqstan Respublikası Prezidenti Nursultan Nazarbaev Ózbekstan xalqın Nawrız benen qutlıqlaw maqsetinde Samarqand qalasına keldi.
Joqarı dárejeli miymandı Prezident Shavkat Mirziyoev kútip aldı.
Samarqand qalasındaǵı Forumlar kompleksinde eki mámleket basshılarınıń ushırasıwı boldı.
Tuwısqan ózbek hám qazaq xalıqları ázelden birge jasaǵan, jaqsı kúnlerde de, qıyınshılıq demlerinde de bir-birin qollap-quwatlaǵan. Bunday doslıq hám tatıwlıq búgingi kúnde xalıqlarımız arasındaǵı baylanıslarǵa bekkem tiykar bolmaqta.
Shavkat Mirziyoev hám Nursultan Nazarbaevtıń baslaması menen Ózbekstan hám Qazaqstan arasındaǵı birge islesiw jańa basqıshqa kóterildi. Ellerimizdiń ministrlikleri hám vedomostvoları, aymaqları arasındaǵı baylanıslar jedellesti. Transport jolları ashılıp, temir jol hám avtobus qatnawları jolǵa qoyıldı.
Mádeniy-gumanitarlıq birge islesiw keńeydi. Kórkem-óner hám mádeniyat ǵayratkerleri, shayır hám jazıwshılar eki eldegi kórgizbeler menen festivallarda, mádeniy-aǵartıwshılıq ilajlarda belsene qatnaspaqta. 2018-jılı Qazaqstanda Ózbekstan jılı ótkerilip atırǵanı xalıqlarımız arasındaǵı mádeniy baylanıslardı bunnan bılay da rawajlandırıwǵa xızmet etedi.
Prezidentler regionnıń mámleketleri, atap aytqanda, Ózbekstan hám Qazaqstan arasındaǵı shın kewilli qatnasıqlar hár qashanǵıdan da bekkemlenip atırǵanın atap ótip, shegaralardaǵı jeńillikler eki el xalıqlarınıń óz-ara barıs-kelisi ushın keń jol jáne imkaniyatlar ashqanın, onda eń úlken maqset bolǵan xalıqlarımızdıń razılıǵına eriskenligin atap ótti.
Ózbekstan hám Qazaqstan arasındaǵı birge islesiwdiń búgingi jaǵdayı joqarı bahalandı, onı bunnan bılay da rawajlandırıwǵa tiyisli máseleler boyınsha pikir alısıldı.
Nursultan Nazarbaev hám Shavkat Mirziyoev Házireti Xizr kompleksine barıp, ǵárezsizligimizdiń tiykarın salıwshı Islam Kárimovtıń qábirin zıyarat etti. Birinshi Prezidentimizdiń qábirine gúl qoyıp, onıń esteligine húrmet kórsetti. Quran oqıldı.
Qazaqstan Prezidenti mámleketimizdiń basshısı menen birgelikte Samarqandtıń dıqqatqa ılayıq orınların tamasha etti.
Usınıń menen Qazaqstan Respublikası Prezidenti Nursultan Nazarbaevtıń elimizge saparı juwmaqlandı.
ÓzA