Áziz watanlaslar!
Qádirdan elimiz – Ózbekstanımızǵa jasarıw, báhár hám gózzallıq bayramı – Nawrız kirip kelmekte.
Áne, usı qutlı áyyyam-Shıǵıstıń jańa jılı menen siz, húrmetli ata-analardı, mehriban apa-qarındaslarımızdı, súyikli perzentlerimizdi, pútkil xalqımızdı shın júrekten qutlıqlayman.
Kewillerimiz shadlıqqa hám quwanıshqa tolǵan mine, usı nurlı demlerde bársheńizge densawlıq, shańaraqlarıńızǵa ıǵbal-baxıt, qut-bereket tileymen.
Qádirli doslar!
Búgin kóp milletli xalqımız atızlarda hám dalalarda, maydanlarda hám qıyabanlarda, tábiyat qushaǵında seyil-tamashalar ótkerip, Nawrız áyyyamın kútip almaqta.
Jeti jastan jetpis jasqa shekem barlıq watanlaslarımız úlken quwanısh penen bir-birin qutlıqlap, usınday jaqtı kúnlerge jetkergeni ushın shúkirshilik etpekte.
El-jurtımızdıń teberik jerimizge, ana diyarımızǵa mehiri, óz-ara tatıwlıq, miyrim-shápáát pazıyletleri jáne de ayqın kózge taslanbaqta.
Usınday gózzal pasılda tábiyattaǵı ózgerislerge úylesip, jámiyetimiz, turmısımız da ózgerip, jańalanıp barmaqta.
Jańa jaylar, bilimlendiriw, medicina hám mádeniyat orınları, zamanagóy kárxanalar, abat awıllar hám qalalar elimiz shırayına shıray qospaqta.
Nawrız filosofiyası, Nawrız qádriyatları – adamlardıń dárti hám táshwishi menen jasaw, kekselerge húrmet, mútáj adamlarǵa itibar hám járdem beriw, ádalatlıq hám xalıqtı súyiwshilik háreketlerimizdiń ólshemine aylanbaqta.
Biz eń dáslep analarımızdı, hayal-qızlarımız benen perzentlerimizdi, pútkil xalqımızdı razı etiwdi óz aldımızǵa iygilikli wazıypa etip qoyǵanbız. Bul ullı maqsetke, álbette, erisemiz. Sonda turmısımız jáne de abat hám abadan, ullı Áliysher Nawayı babamızdıń aytqanlarınday, hár kúnimiz Nawrız boladı.
Búgin tájiriybeli diyqan hám fermerlerimiz úlken arzıw-niyetler menen jańa miynet máwsimin baslamaqta. Bárshemiz jılımız qutlı kelsin, zúráátimiz mol bolsın, miynetińizden bereket tabıń, dep olardı qutlıqlap, jumıslarına tabıs tileymiz.
Áziz doslar!
Mine, bir neshe jıllardan berli, Birlesken Millletler Shólkeminiń qararına muwapıq Nawrız bayramı xalıqaralıq kólemde keńnen belgilenbekte.
Haqıyqatında da bul biytákirar bayram barlıq jaqsı niyetli insanlardı birlestiredi, olardıń kewlinde eń gózzal hám ullı sezimlerdi oyatadı. Sol sebepli de Nawrız bayramı ǵárezsizlik jıllarında, milleti, tili hám dinine qaramastan, diyarımızda jasap atırǵan barlıq watanlaslarımızdıń ardaqlı jáne súyikli bayramına aylandı.
Búgin shet el diplomatiyalıq korpus wákilleri, shet elli doslarımız hám sheriklerimiz Nawrız quwanıshın biz benen birge bólispekte.
Pursattan paydalanıp, áziz miymanlarımızǵa, barlıq jaqın hám uzaq mámleketlerdegi xalıqlarǵa shın júrekten shıqqan qutlıqlawlarımızdı jollap, olarǵa tınıshlıq-tatıwlıq, rawajlanıw hám abadanlıq tileymiz.
Qádirli hám húrmetli watanlaslarım!
Mine, usı quwanıshlı demlerde siz, ázizlerge, pútkil xalqımızǵa eń jaqsı tileklerimdi bildirgenimnen baxıtlıman.
Shıǵısqa tán jańa jılımız hár bir shańaraqqa, hár bir úyge baxıt hám quwanısh alıp kelsin!
Barlıq pák arzıw-niyetlerimiz ámelge assın!
Elimiz tınısh, xalqımız aman bolsın!
Nawrız bayramı bárshemizge múbárek bolsın!
Shavkat MIRZIYoEV,
Ózbekstan Respublikası Prezidenti