Nókis qalası hákimligi jaslar arasında «Qalamız boylap sayaxat et!» atamasında eń jaqsı turistlik (qalamızdıń turistlik hám kórkem óner orınları, milliy taǵamlar, milliy kiyimler hám milliy úrp-ádetler) tematikasındaǵı foto-súwretler tańlawın járiyaladı. Bul haqqında qala hákimliginiń rásmiy veb-saytı xabar bermekte.

Tańlawdıń dáslepki basqıshı usı jıldıń 20-mart hám 20-aprel kúnleri aralıǵında ótkeriledi. Onda qatnasıwshılar jeke ózi tárepinen túsirilgen, A4 formatta, shártli túrde ramkalanǵan, joqarı dárejedegi sapada (reńli yamasa aq-qara reńli), keminde 3 dana foto-súwret menen qatnasıwı múmkin. Hár bir súwrettiń ataması (túsirilgen orın ataması hám waqtı menen) kórsetiliwi shárt. Foto-súwretlerdegi kórinisler jawızlıq, urıs yamasa uyatsızlıqtı jáne basqa da unamsız illetlerdi úgit-násiyatlamawı talap etiledi.

Tańlawdıń dáslepki basqıshına usınılǵan foto-súwretler kórgizbege qoyıladı.

Jeńimpazlar shólkemlestiriwshiler tárepinen tayarlanǵan sawǵalar menen sıylıqlanadı.

Tańlaw shártleri menen tolıq tanısıw ushın Ózbekstan jaslar awqamınıń Nókis qalalıq Keńesine múrájat etseńiz boladı.

Qaraqalpaqstan xabar agentligi