Ózbekstan Respublikası Prezidentiniń 2018-jıl 23-fevraldaǵı «2018-jılǵı Nawrız ulıwmaxalıqlıq bayramına tayarlıq kóriw hám onı ótkeriw haqqında»ǵı qararına muwapıq, bul bayram respublikamızdıń barlıq qala hám rayonlarında kóterińki ruwxta dawam etpekte.
Usı qarar tiykarında, bir topar zıyalılar menen elimizdiń kórnekli insanlarınan dúzilgen úgit-násiyat toparı bir neshe kúnnen berli respublikamızda bolıp, orınlarda ótkerilip atırǵan mádeniy ilajlarda qatnaspaqta.
Olar usı jıl 14-mart kúninen berli úsh toparǵa bólinip Shomanay, Kegeyli, Ámiwdárya, Moynaq, Qaraózek, Qońırat, Beruniy rayonlarında bolıp, sol jerlerde ótkerilgen bayram ilajlarına qatnastı.
16-mart kúni olar Shımbay, Tórtkúl, Ellikqala rayonlarına bardı.
Shınında da, ana tábiyattı súyiw, ardaqlaw, ómir gúltajı bolǵan insandı qádirlew, Watanǵa muhabbat hám sadıqlıq sıyaqlı ideyalardı ózinde jámlegen «Nawrız» – xalqımızdıń eń áyyemgi bayramlarınıń biri bolıp esaplanadı.
Bayram seyillerinde xalqımızǵa inam etilgen folklorlıq ansambllerdiń, kórkem háweskerlik jámáátleriniń, dárwazlardıń, cirk artistleriniń, shańaraqlıq ansambllerdiń, baqsılar menen jırawlardıń, kórkem óner sheberleri jáne estrada qosıqshılarınıń, sonday-aq, balalar muzıka hám kórkem óner mektepleriniń atqarıwındaǵı koncert baǵdarlamaları hám saxnalastırılǵan bayram tamashaları jıynalǵanlarǵa úlken zawıq baǵıshladı.
«Áziz Watanlaslar, hár kúnińiz Nawrız bolsın!» degen ideyanı ózinde jámlegen bul bayram ilajlarında insannıń tábiyat perzenti ekenligi, onıń ajıralmas bir bólegi dep seziniwdi, qorshaǵan ortalıqtı, tuwǵan jerdi qásterlep-saqlawdı, búgingi tınısh, erkin hám abadan turmıstı qádirlewdi, onı qorǵap jasawdı úgit-násiyatlawshı bir qatar ruwxıy-aǵartıwshılıq ilajlar ámelge asırıldı. «Nawrız»dıń tariyxı, mazmunı hám filosofiyası, usı bayramdı ótkeriwge baylanıslı úrp-ádetler, qádriyatlar hám dástúrlerdiń áhmiyeti jáne bir márte keńnen túsindirildi. Ǵalaba seyiller shólkemlestirilip, qoshqar dúgistiriw, qoraz urıstırıw, palwanlar gúresi, arqan tartısıw sıyaqlı milliy jarıslar ótkerilip, qazanlarda palaw, júweri gúrtik, góje sıyaqlı milliy taǵamlar tayarlandı.
Topar aǵzaları – Mádeniyat hám kórkem óner mákemeleri menen islesiw bóliminiń baslıǵı Rajab Rajapov, Milliy súwretshilik hám dizayn institutınıń prorektorı, professor Dilfuza Rahmatullaeva, Ózbekstan Milliy universitetiniń docenti Twlqin Eshbekov, Ózbekstan Jazıwshılar awqamınıń aǵzası, shayır Chorsham Rwziev, Ózbek Milliy akademiyalıq drama teatrınıń aktyorı Xamid Toshpwlatovlar jergilikli hákimiyat wákilleri menen birlikte járdemge mútáj insanlardan, kekselerden, kem támiyinlengen shańaraqlardan da xabar alıp, olarǵa biyǵárez járdem kórsetiw sıyaqlı sawaplı, qayırqomlıq ilajlarda qatnastı.
Úlkemiz boylap bayram tamashaları dawam etpekte.
Á.Jiemuratov,
Qaraqalpaqstan xabar agentliginiń xabarshısı