Mine, jáne báhár keldi. Kún jılıp, jaǵımlı samal kewillerge quwanısh baǵıshlamaqta. Xalqımız arasında neshe mıńlaǵan jıllardan berli dástúrge aylanǵan «Nawrız» bayramın belgilew bıyıl da kóterińki ruwxta baslanıp ketti.
Usı jıl mart ayında bayramnıń shólkemleskenlik jaǵdayında ótkeriliwin támiyinlew maqsetinde Qaraqalpaqstan Respublikası Mádeniyat ministrligi tárepinen bir qatar ilajlardıń ámelge asırılıwı kútilmekte.
Atap aytqanda, paytaxtımızda 21-mart kúni saat 10:00 den 17:30 ǵa shekem úsh jerde, yaǵnıy, I.V.Savickiy atındaǵı qaraqalpaq mámleketlik kórkem óner muzeyi menen «Jaslar orayı» aldındaǵı maydanda, «Istiqlol» balalar mádeniyat hám dem alıw baǵında «Nawrız» ulıwma xalıqlıq bayram seyili ótkeriledi.
«Áziz Watanlaslar, hár kúnińiz Nawrız bolsın!» atamasında ótkeriletuǵın bul ilajlarda xalıqtıń kewilli dem alıwı ushın barlıq qolaylıqlar jaratılıp, bayramǵa baǵıshlanǵan hár qıylı koncert baǵdarlamaları, teartrlastırılǵan bayram tamashaları ótkeriledi.
Máselen, I.V.Savickiy atındaǵı Qaraqalpaq mámleketlik kórkem óner muzeyi aldındaǵı maydanda ótkeriletuǵın ilajda Berdaq atındaǵı akademiyalıq muzıkalı teatr jámáátiniń, 12-sanlı Balalar kórkem óner muzıka mektebi oqıwshılarınıń, shayırlardıń shıǵıwları, hár qıylı sport oyınlarınıń ótkeriliwi kútilmekte. «Ámiw tolqını» folklor etnografiyalıq ansambliniń, Qaraqalpaq mámleketlik universitetiniń «Húrliman» xalıq ansambliniń, Shımbay, Ámiwdárya, Tórtkúl, Xojeli, Qaraózek rayonlarındaǵı ansambller menen háweskerlerdiń, «Ózbekkoncert» mámleketlik mákemesiniń estrada qosıqshılarınıń, Ayqulash juldızları» ansambli sazendeleriniń hám basqa da milliy mádeniy oraylardıń shıǵıwları jıynalǵanlarǵa úlken zawıq baǵıshlaydı, dep oylaymız. Orınlarda baqsı, jıraw hám shıńqobız namaları jańlap turadı.
«Jaslar orayı» aldındaǵı maydanda, «Istiqlol» balalar mádeniyat hám dem alıw baǵında ótkeriletuǵın ilajlar da derlik usı taqılette. Ózgesheligi olarǵa qosımsha Jas tamashagóyler hám Quwırshaq teatrlarınıń, dárwazshılardıń shıǵıwları, hár qıylı attrakcionlar seyil qatnasıwshılarına ózgeshe úlken zawıq baǵıshlaytuǵınına isenemiz.
Al, respublikamızdıń qala hám rayonlarında ótkeriletuǵın bayram ilajları rayon oraylarındaǵı mádeniyat dem alıw baǵlarında hám oraylıq sport maydanshalarında bolıp ótedi.
Á.Jiemuratov,
Qaraqalpaqstan xabar agentliginiń xabarshısı.