Burın xabar berilgenindey, 11-mart kúni Qaraqalpaq mámleketlik quwırshaq teatrında Ózbekstan bodibilding, fitnes hám mas-restling federaciyasınıń Qaraqalpaqstan filialı tárepinen sporttıń bodibilding túri boyınsha birinshi márte Qaraqalpaqstan ashıq chempionatı ótkerildi.

Chempionatta háweskerler arasında ótkerilgen «Arnold klassik – 2018» tańlawınıń altın medal iyesi, chempion, Ózbekstan saylandı komandası aǵzası Mixail Volınkin miymanda boldı.


Ashıq chempionatqa Ózbekstan boyınsha barlıq aymaqlardan 13 salmaq kategoriyasında 70ten aslam sportshılar qatnastı.

– Ashıq chempionatqa respublikamızdıń Buxara, Nawayı, Tashkent, Ándijan, Jizzaq hám Xorezm wálayatlarınan bodibildingshiler keldi, – deydi Ózbekstan bodibilding, fitnes hám mas-restling federaciyası Qaraqalpaqstan filialınıń baslıǵı Baxıt Shuvaqbaev. Keleshekte mas-restling hám arm-restling boyınsha jarıslar ótkeriw rejelestirilmekte.


Jarıs juwmaǵında 75 kg salmaq kategoriyasında Ilham Mırzamuratov (QMU dene mádeniyatı fakulteti 1-basqısh studenti) 1-orın, 85 kg salmaq kategoriyasında Nursayit Ergashov 2-orın, 70 kg salmaq kategoriyasında Alixan Raxmetov 3-orın, 80 kg salmaq kategoriyalarında Alpamıs Allambergenov 3-orın, Islam Serjanov (NMPI dene mádeniyatı fakulteti 3-basqısh studenti) 4-orın, Zafar Shukurullaev (QMU tariyx hám huqıq fakulteti 1-basqısh studenti) 4-orın jeńimpazları dep tabıldı.

Jeńimpazlar shólkemlestiriwshiler tárepinen tayarlanǵan diplom hám estelik sawǵaları, sonday-aq, aqshalay sıylıqlar menen sıylıqlandı.

Qaraqalpaqstan xabar agentligi