«Balalardıń densawlıǵına zıyan jetkeretuǵın málimlemeden olardı qorǵaw haqqında»ǵı Ózbekstan Respublikasınıń nızamı kúshke kirdi, dep xabar bermekte ÓzA.

Bul nızamda málimleme ónimleriniń jasqa baylanıslı klassifikaciyalanıwı hám jas kategoriyaların belgilew máselelerine ayrıqsha dıqqat qaratılǵan. Bul jámiyetimiz ushın jańalıq boldı. Bunnan bılay ǵalaba xabar quralları, sonıń ishinde, Internet globallıq tarmaǵındaǵı veb-saytlar, blogerler, reklama quralları hám basqa da túrdegi málimleme kanalları arqalı tarqatılıp atırǵan málimlemelerde balalardı olardıń densawlıǵına zıyan jetkeriwi múmkin bolǵan xabarlardan qorǵaw maqsetinde 0+, 7+, 12+, 16+ hám 18+ belgileri kórsetiliwi shárt.

Nızamǵa muwapıq, jasqa baylanıslı kategoriyanı belgilew málimleme ónimin islep shıǵarıwshılar hám tarqatıwshılar tárepinen, atap aytqanda, ekspertler menen birge islesken halda elimiz boylap tarqatıw baslanǵanǵa shekem ámelge asırıladı. Yaǵnıy nızam kúshke kiriwi menen hár bir málimleme tarqatıwshı puqara sergeklikke ámel etken halda ózleri yamasa usı taraw boyınsha ekspertlerdiń juwmaǵına bola tarqatılıp atırǵan málimlemege jas kategoriyasın qosıwı kerek boladı.

Esletip ótemiz, 2017-jıldıń 9-sentyabr kúni qabıl etilgen bul nızam usı jıldıń 9-martınan baslap kúshke kirdi.

Qaraqalpaqstan xabar agentligi