Foto: Aral teńizi jaǵası
Ózbekstan Respublikası Prezidenti Shavkat Mirziyoevtiń basshılıǵında usı jıl 22-fevral kúni bolıp ótken videoselektorda shet elli turistlerdiń aǵımın kóbeytiw hám ishki turizmdi bunnan bılay da rawajlandırıw, turistlik xızmetlerdi jaqsılaw hám xızmet túrlerin keńeytiw boyınsha kórilip atırǵan ilajlardıń nátiyjeliligi sın kózqarastan talqılanǵan edi.
-Búgingi kúni respublikamızda jámi 34 turistlik shólkem jumıs alıp barıp, olar tárepinen ótken jılı 8246 turistke xızmet kórsetildi,-deydi Turizmdi rawajlandırıw boyınsha mámleketlik komiteti Qaraqalpaqstan Respublikası aymaqlıq basqarmasınıń baslıǵı Bayram Kusekeev.-Respublikamızǵa tiykarınan Franciya, Ullı Britaniya, Germaniya, AQSh, Rossiya hám Yaponiya ellerinen turistler kóplep kelmekte. Olarǵa 314,5 mıń AQSh dolları muǵdarında eksport xızmeti kórsetildi.
Foto: Aral teńizi jaǵası
Ózbekstan Respublikası Prezidentiniń 2017-jıl 18-yanvardaǵı «2017-2018-jıllarda Aralboyı regionın rawajlandırıwdıń Mámleketlik baǵdarlaması haqqında»ǵı qararınıń orınlanıwın támiyinlew boyınsha qabıl etilgen ilajlar rejesi sheńberinde Aral teńiziniń jaǵısında eki turistlik kompleks iske túsirildi. Moynaq rayonındaǵı «Ashıq aspan astındaǵı kemeler muzeyi» átirapında «Muinok tour» JShJ tárepinen 4 qara úy, «Moynaq» mayagi hám awqatlanıw ornı shólkemlestirildi. Bul obektlerdiń átirapı abadanlastırılıp, teńizdiń tariyxı hám kartası jazıp qoyıldı.
Foto: Ellikqala. Aqshakól
Bıyılǵı jılı Nókis qalasında, Tórtkúl, Ellikqala hám Moynaq rayonlarında zamanagóy miymanxanalar, jaylastırıw obektlerin qurıw rejelestirilmekte. Bunnan tısqarı, Moynaq rayonındaǵı «Sudoche» kóliniń boyında dem alıw orayın, balıq ónimlerinen milliy taǵamlar tayarlaytuǵın awqatlanıw ornın shólkemlestiriw joybarları islep shıǵılmaqta.
Foto: Sudoche
Ózbekstan Respublikası Ministrler Kabinetiniń 2018-jıl 31-yanvardaǵı «2018-2019-jıllarǵa mólsherlengen Qaraqalpaqstan Respublikasınıń turizm potencialın bunnan bılay da rawajlandırıw boyınsha qosımsha ilajlar baǵdarlaması» tastıyıqlanǵan bolıp, onda jámi 42 joybardı ámelge asırıw, sonıń ishinde 8 miymanxana, 3 kemping, 3 logistika orayı hám 1 turistler ushın awqatlanıw ornınıń qurılısı názerde tutılǵan. Moynaq rayonında aymaqtıń etnografiyalıq ózgesheliginen kelip shıqqan halda «Ethno-Village», Ellikqala rayonındaǵı «Aqsha qól»diń jaǵasında turistlik kompleksler qurıw rejelestirilmekte. Paytaxtımızdaǵı I.V.Savickiy atındaǵı Qaraqalpaq mámleketlik kórkem óner muzeyine respublikamızdıń barlıq qala hám rayonlarınan sayaxatshılardı qamtıǵan halda turlar shólkemlestirilip atır. Aral boyınıń turizm jáne ekoturizm potencialı tuwralı ózbek, rus, inglis tillerinde katalog, kitap hám flayerler tayarlanadı. Milliy kórkem ónerimiz, úrp-ádetlerimiz, dástúr jáne qádiriyatlarımızdı keńnen úgit-násiyatlaw maqsetinde «Jaslar folklorı» respublikalıq festivalı, «Abbaz hawazı, Qaratereń ırǵaqları» folklor festivalı, jırawlar, baqsılar, shayırlar hám qıssaxanlardıń qatnasında «Qur» festivalı ótkeriledi.
Foto: Moynaq. Eski teniz jaǵısındaǵı otawlar
Ózbekistan Respublikası Prezidentiniń 2018-jıl 3-fevraldaǵı «Ózbekistan Respublikasınıń turizm potencialın rawajlandırıw ushın qolaylı sharayatlar jaratıw boyınsha qosımsha shólkemlestiriw ilajları haqqında»ǵı Pármanınıń, 2017-jıl 7-fevraldaǵı «Ishki turizmdi jedel rawajlandırıwdı támiyinlew ilajları haqqında»ǵı qararınıń orınlanıwın támiyinlew, sonday-aq, aymaqlardı turaqlı sociallıq-ekonomikalıq rawajlandırıwdıń eń áhmiyetli faktorlarınan biri sıpatında ishki turizmdi jedel rawajlandırıw, puqaralardı elimizdiń mádeniy-tariyxıy miyrası hám tábiyǵıy baylıqları menen tanıstırıw maqsetinde «Ózbekstan boylap sayaxat et!» ishki turizmdi rawajlandırıw baǵdarlaması tastıyıqlandı. Qaraqalpaqstan Respublikası Ministrler Keńesi tárepinen Turizmdi rawajlandırıw boyınsha mámleketlik komiteti Qaraqalpaqstan Respublikası aymaqlıq basqarması, Ózbekstan Jaslar awqamı Qaraqalpaqstan Respublikası Keńesi, Qaraqalpaqstan kásiplik awqamları shólkemleri birlespesi keńesi, Hayal-qızlar komiteti, «Máhálle», «Nuraniy» qorları menen birgelikte turizm infrastrukturasınıń bántligin esapqa alǵan halda aymaqlar jáne tartılǵan shólkemler kóleminde turlar hám ekskursiyalardı shólkemlestiriw kesteleri tastıyıqlanbaqta. Bunda xalqımızdı, ásirese, máhálle belsendilerin, nuranıylardı, jaslardı hám járdemge mútáj shańaraqlardıń wákillerin elimiz boylap tariyxıy orınlarǵa alıp barıw ilajları kórilmekte.
D.ABIBULLAEV,
Qaraqalpaqstan xabar agentliginiń xabarshısı