6-mart kúni paytaxtımızdaǵı Jaslar orayında Ózbekstan jaslar awqamı Qaraqalpaqstan Respublikalıq Keńesi tárepinen shólkemlestirilgen «Jaslar shaxmat taxtası» turniriniń Qaraqalpaqstan Respublikalıq basqıshı ótkerildi.
Oǵan 190 nan aslam oqıwshı-jaslar qatnastı.
Turnirdi ótkeriwden tiykarǵı maqset – elimizde shaxmat sportın keńnen en jaydırıw hám onıń ǵalabalıǵına erisiw, háweskerler hám jas shaxmatshılardıń sport tájiriybelerin arttırıw, oqıwshılardıń oqıwdan bos waqıtların mazmunlı shólkemlestiriw, ósip kiyatırǵan jas áwladtıń logikalıq oy-órisin, pikirlew dárejesin jetilistiriw, jaslardı sport jarıslarına ǵalaba túrde qamtıp alıw, jaslar arasında salamat turmıs tárizin qáliplestiriw hám mádeniy sport baylanısların jolǵa qoyıwdan ibarat.
Turnir 6 jas kategoriyasında (ulıwma bilim beriw mekteplerinen 8, 10, 12, 14, 16 hám orta arnawlı kásiplik bilimlendiriw orınları oqıwshılarınan 17-19 jas aralıǵındaǵı) er hám qız balalar qatnastı.
Turnir juwmaǵında er balalar arasında Sultanbek Kewlimjaev, Jahongir Madenbaev, Aǵabek Turaev, Beginch Toraev, Merdan Turaev, Mırzaxmet Ómirbaevlar, al qızlar arasında Sarbinaz Mamutova, Rayxana Shamuratova, Mexriban Abdijamilova, Baxtıgúl Shkolbaeva, Jazira Jumaǵanbetova, Muxabbat Temirbaevalar jeńimpaz dep tabıldı.
Turnirde jeńimpaz bolǵan 12 jas sportshı usı jıldıń aprel ayında Surxandárya wálayatınıń Termiz qalasında bolıp ótetuǵın Respublikalıq basqıshqa jollamanı qolǵa kirgizdi.
Turnir jeńimpazları Ózbekstan jaslar awqamı Qaraqalpaqstan Respublikalıq Keńesi tárepinen tayarlanǵan diplom hám estelik sawǵaları menen sıylıqlandı.
Gawhar BEGJANOVA,
QMU jurnalistika qánigeligi 2-basqısh studenti