Paytaxtımız Nókis qalasında «NUKUS ZIYADA NUR» oqıw orayınıń ashılıw saltanatı bolıp ótti.
Jańa oqıw orayında tigiw-pishiw, milliy taǵamlar tayarlaw, kompyuter, milliy naǵıs toqıw, toqımashılıq, karving, erler hám hayal-qızlar shashtárezi, tort bezew, massaj sıyaqlı jigirmadan aslam tarawlar boyınsha bilim sırları úyretiledi.
Oqıw orayınıń ashılıwında Ózbekistan Respublikası Prezidentiniń jaqında qabıl etilgen «Hayal-qızlardı qollap-quwatlaw hám shańaraq institutın bekkemlew tarawındaǵı jumıstı túp-tiykarınan jetilistiriw ilajları haqqında»ǵı qararı tiykar boldı, – deydi oqıw orayınıń direktorı Zıyada Utenazarova. Oraydı ashıwımızdaǵı maqset hayal-qızlardıń, sonıń ishinde, úlken ómirge qádem taslap atırǵan jaslarımızdıń jámiyette, shańaraqta, turmısta óz ornın tabıwǵa óz úlesimizdi qosıwdan ibarat. Búgingi kúnniń talabınan kelip shıqqan halda keleshekte ustashılıq, anıq pánler hám shet tillerin úyreniw kursların ashıwdı maqset etkenbiz.
Ilajda Qaraqalpaqstan Respublikası Ministrler Keńesi Baslıǵınıń orınbasarı, respublikalıq Hayal-qızlar komitetiniń baslıǵı Z.Ibragimova qatnastı.
D.ABIBULLAEV
Qaraqalpaqstan xabar agentliginiń xabarshısı