Jenevada BMShtıń insan huqıqları boyınsha keńesiniń 37-sessiyası jumıs basladı.
Bıyıl Insan huqıqları boyınsha ulıwma dúnya júzilik deklaraciyası qabıl etilgenine 70 jıl toladı. Usı sáneni belgilew sheńberinde shólkemlestirilgen sessiyada Insan huqıqların qorǵawdıń áhmiyetli máseleleri dodalanbaqta. Ilajda 180 nen aslam elden 3 mıńnan zıyat wákil qatnaspaqta.
Májilistiń ashılıw máresiminde BMShtıń Bas xatkeri Antoniu Guterrish, Insan huqıqları boyınsha Joqarı komissar Zayd Rad al-Husayn hám BMSh Bas assambleyası 72-sessiyasınıń baslıǵı Miroslav Laychak pútkil dúnyada insan huqıqlarına ámel etiw hám bul tarawda xalıqaralıq birge islesiwdi rawajlandırıw zárúrligin atap ótti.
Ilajǵa Ózbekstan ádillik ministri R.Davletov, Insan huqıqları boyınsha milliy oraydıń direktorı A.Saidov, Sırtqı isler ministrligi hám elimizdiń Jenevadaǵı turaqlı wákilxanasınıń xızmetkerleri qatnaspaqta.
R.Davletov ilaj qatnasıwshıların Ózbekstanda puqaralardıń tiykarǵı huqıqları menen erkinliklerin támiyinlew boyınsha ámelge asırılıp atırǵan reformalar menen tanıstırdı. Atap aytqanda, Prezidenttiń Xalıq qabıllawxanalarınıń jumısına tiyisli ózine tán tájiriybege baylanıslı maǵlıwmat berdi.
Jınayatshılıqqa qarsı gúresiwdiń pútkilley jańa, bárinen burın, aldın alıw hám onı erte anıqlawǵa baǵdarlanǵan sistemasın engiziw máselesi haqqında da sóz etildi. Sud-huqıq tarawı hám jınayattı ashıw sistemasındaǵı reformalar, atap aytqanda, Sudyalardıń joqarǵı keńesi shólkemlestirilgeni, yaǵnıy ekonomikalıq hám hákimshilik sudlar dúzilgeni haqqında maǵlıwmat berilip, elimizde birinshi márte engizilgen keshirim beriw, jınayatlardı ashıwda zorlıq qollanılıwına jol qoymaw boyınsha talaplarǵa ámel etiliwine baylanıslı nátiyjeler tanıstırıldı.
Sessiyada birinshi márte Ózbekstannıń 2021-2023-jıllarda BMShtıń Insan huqıqları boyınsha keńesine aǵza bolıp saylanıw tilegi bildirildi.
Ózbekstan delegaciyası usınǵan maǵlıwmatlar, sonıń ishinde, bıyıl noyabr ayında Samarqandta bolıp ótetuǵın Insan huqıqları boyınsha Aziya forumına tayarlıq procesi sessiya qatnasıwshılarında úlken qızıǵıwshılıq oyattı.
Norgul ABDURAIMOVA,
ÓzAnıń xabarshısı