2018 –jılı 8 mıńǵa shamalas pedagog kadrlar attestaciyadan ótiwi kútilmekte. Házirgi waqıtta oqıtıwshılardıń kategoriyasın qorǵaw hám jańa kategoriya beriw Ózbekstan Respublikası Ministrler Kabineti janındaǵı Bilimlendiriw sapasın qadaǵalaw mámleketlik inspekciyası tárepinen hár 5 jılda bir márte tólemli túrde belgili bir sınaqlar tiykarında ámelge asırıladı.

Hár bir joqarı hám 1-kategoriyalı lawazımındaǵı, sonday-aq, usı kategoriyalarǵa talaban pedagog kadr Mámleketlik byudjetke eń kem is haqı muǵdarında tólem tólewi bıyıldan baslap engizilmekte. Ápiwayı qánige hám joqarı kategoriyalı oqıtıwshıǵa tólenetuǵın miynet haqı arasındaǵı parıq barı-joǵı 22 procentti quraǵan búgingi jaǵdayda bul ózgeris ádillik normalarına sáykes kelmey turǵanday.

Respublikamızdıń bilimlendiriw salasında 481 joqarı kategoriyalı, 1379 birinshi kategoriyalı, 3446 ekinshi kategoriyalı oqıtıwshılar hám 2502 qánige jumıs alıp barmaqta.

Ózbekstan Milliy málimleme agentliginde járiyalanǵan maqalada Xalıq bilimlendiriw ministrliginiń juwapker wákilleri házirgi kúnde usı másele boyınsha tiyisli usınıslar tayarlanıp atırǵanı haqqında málim etkeni jazılǵan edi.

Bul usınıslar inabatqa alınsa, mekteplerde sabaq berip atırǵan ápiwayı qánige menen ekinshi, birinshi, joqarı kategoriyalı oqıtıwshıǵa tólenetuǵın is haqı arasında sezilerli dárejede parıq boladı. Joqarı tájiriybe hám jumıs stajına iye pedagogtıń is haqı keskin artadı. Bunda direktor fondı esabınan tólenetuǵın ústemeler ulıwmalastırıladı. Yaǵnıy ústemeni direktor belgilemeydi. Sonda tájiriybeli, jaqsı oqıtıwshılardıń abıroy-itibarı, qádiri joqarı boladı.

M.PIRNAZAROVA,

Qaraqalpaqstan xabar agentliginiń xabarshısı.