Nukus harbiy sudining devonxona mudiri D.Allashov tomonidan O‘zbekiston Respublikasi DXX chegara qo‘shinlari qo‘mondonligiga qarashli harbiy qism harbiy xizmatchilari ishtirokida “Yangi O‘zbekiston-huquqiy demokratik davlat: inson huquqlari va erkinliklarini himoya qilishning huquqiy asoslari, qonunchilikni yanada rivojlantirish istiqbollari” mavzusida targ‘ibot tadbiri o‘tkazildi.

Unda qayd etilganidek, yangi tahrirdagi Konstitutsiyada inson huquq va erkinliklarining muhofazasi yanada takomillashtirilmoqda. Jumladan, Konstitutsiyamiz ilgari amal qilib kelgan “davlat – jamiyat – inson” tamoyilini “inson – jamiyat – davlat” deb o‘zgartirish, ya’ni, eng avvalo, inson manfaatini har narsadan ustun qo‘yishni maqsad qilgan.

Loyihaga asosan insonning sha’ni va qadr-qimmati daxlsizdir, hech narsa ularni kamsitish uchun asos bo‘lishi mumkin emas. Insonning huquq va erkinliklari bevosita amal qiladi hamda qonunlar, davlat organlari va mansabdor shaxslar faoliyatining mazmun-mohiyatini belgilab beradi.

Jumladan, O‘zbekiston Respublikasining yangi tahrirda qabul qilinishi kutilayotgan Konstitutsiyasida har kimga malakali yuridik yordam olish huquqi kafolatlanishi, qonunda nazarda tutilgan hollarda, yuridik yordam davlat hisobidan ko‘rsatilishi, huquqbuzarliklardan jabrlanganlar huquqlari qonun bilan muhofaza qilinishi belgilangan. Shuningdek davlat jabrlanganlarga himoyalanish va odil sudlovdan foydalanishni ta’minlashi, ularga yetkazilgan zararning o‘rni qoplanishi uchun shart-sharoitlar yaratilishi ta’minlanishi ko‘zda tutilmoqda.

Tadbir ishtirokchilarning mavzuga oid savol-javoblari bilan davom etdi.

Dovud ABIBULLAEV, O‘zA