Tadbirda Belarus Respublikasi Bosh vaziri Sergey Rumas, Moldova Respublikasi Bosh vaziri Ion Kik, Ozarbayjon Respublikasi Bosh vaziri Ali Asadov, Rossiya Federatsiyasi Hukumati Raisi Mixail Mishustin, Tojikiston Respublikasi Bosh vaziri Qohir Rasulzoda, Qozogʻiston Respublikasi Bosh vaziri Asqar Mamin, Armaniston Respublikasi Bosh vaziri oʻrinbosari Mger Grigoryan, Qirgʻiziston Respublikasi Bosh vaziri oʻrinbosari Erkin Asrandiyev, Turkmaniston Vazirlar Mahkamasi Raisining oʻrinbosari, tashqi ishlar vaziri Rashid Meredov va MDH Ijroiya qoʻmitasi raisi – Ijrochi kotibi Sergey Lebedev ishtirok etdi.

Majlis qatnashchilari asosiy eʼtiborni MDH doirasidagi iqtisodiy hamkorlikning dolzarb masalalariga, shuningdek, koronavirus pandemiyasi sharoitida koʻrilayotgan birgalikdagi chora-tadbirlarga qaratdi.

Muhokamalar natijasida yangi koronavirus infeksiyasi “COVID-19” tarqalishi munosabati bilan MDHga aʼzo mamlakatlar Hukumat rahbarlarining Bayonoti qabul qilindi. Kengash qaroriga koʻra, mazkur hujjat matni BMT, JSST va boshqa yirik xalqaro tashkilotlarga ham tarqatiladi.

Barqaror iqtisodiy rivojlanish uchun qulay shart-sharoit yaratish, MDHga aʼzo mamlakatlar fuqarolari turmush tarzi va farovonligini oshirish maqsadida tomonlar 2030-yilgacha boʻlgan davrda Hamdoʻstlikni iqtisodiy rivojlantirish strategiyasini tasdiqladilar. MDH mamlakatlari savdo-iqtisodiy hamkorligining bazaviy tamoyillari va asosiy yoʻnalishlarini belgilab beradigan ushbu hujjat Hamdoʻstlikka aʼzo davlatlar iqtisodiyoti raqobatbardoshligini oshirish, shuningdek, oʻzaro manfaatli sheriklikka koʻmaklashishga qaratilgan.

Muloqotlar davomida karantin cheklovlari sharoitida savdo-iqtisodiy va transport-kommunikatsiya sohalarida yoʻlga qoʻyilgan mavjud mexanizmlarni, shuningdek, MDH hududidagi erkin savdo zonasining toʻlaqonli ishlashini saqlab qolish muhimligi qayd etildi.

MDH mamlakatlari aholisi hayot darajasi va sifatini oshirish maqsadida yaxshi qoʻshnichilik, oʻzaro hurmat va manfaatlarni hisobga olgan holda hamkorlikni yana-da kengaytirish zarurligi taʼkidlandi.

MDH Hukumat rahbarlari kengashi majlisi yakunlari boʻyicha transport, energetika, qurilish, taʼlim, madaniyat, turizm, jismoniy tarbiya va sport sohalarini, shuningdek, yoshlar siyosatini rivojlantirishga oid jami 14 ta hujjat imzolandi.

Tomonlar MDH Ijroiya qoʻmitasining Mustaqil Davlatlar Hamdoʻstligiga aʼzo mamlakatlar Hukumat rahbarlari kengashi navbatdagi majlisini joriy yil noyabr oyida Oʻzbekistonda oʻtkazish toʻgʻrisidagi taklifini qoʻllab-quvvatladilar.