Farmatsevtika mahsulotlari xavfsizligi markazi axborot xizmati soha mutaxassislari tomonidan berilgan ma’lumotlar ijtimoiy tarmoqlarda noto‘g‘ri talqin qilinayotganini aytmoqda. Shu bois bildirilayotgan ana shunday fikrlar yuzasidan quyidagilarni ma’lum qildi:
“Dori vositalari va farmatsevtika faoliyati to‘g‘risida”gi O‘zbekiston Respublikasi qonuniga muvofiq, dori vositalarining, tibbiy buyumlarning va tibbiy texnikaning tibbiyot amaliyotida qo‘llanilishiga, qoida tariqasida, ular davlat ro‘yxatidan o‘tkazilgandan keyin ruxsat etiladi. (Hozirga qadar mamlakatimizda 9294 ta dori vositasi davlat ro‘yxatidan o‘tkazilgan.)
Qayd etilganidek, 2023 yil davomida huquqni muhofaza qilish organlari va tibbiyot tashkilotlari hamda fuqarolar tomonidan dori vositalari va tibbiy buyumlarni ekspertiza qilish yuzasidan kelib tushgan murojaatlar asosida 6000 dan ortiq turdagi (davlat ro‘yxatidan o‘tmagan va noqonuniy muomalada bo‘lgan) dori vositalarining tibbiyot amaliyotida qo‘llash mumkin emasligi yuzasidan tegishli xulosalar berildi.
Bundan tashqari, 2022 yilda yurtimizda dori vositalari bilan ro‘y bergan noxush holatlarning qayta takrorlanmasligini oldini olish maqsadida “Farmatsevtika mahsulotlari xavfsizligi markazi” direktorining tegishli buyrug‘iga binoan, 2023 yil davomida Markaz va uning filiallari laboratoriyalarida davlat ro‘yxatidan o‘tkazish, ro‘yxatdan o‘tkazilganlik guvohnomasini amal qilish muddatini uzaytirish, shuningdek, muvofiqlikni baholash (sertifikatlashtirish) maqsadida taqdim etilgan 1000 dan ortiq seriyadagi dori vositalarining tarkibida etilenglikol va dietilenglikolni aniqlash sinovlari amalga oshirildi.
Ta’kidlash joiz, bu nazorat tahlillari orqali, mazkur dori vositalarining tarkibi tekshirilib yuqoridagi zararli moddalar mavjud emasligi aniqlandi. Afsuski bu ma’lumot, ayrim telegram kanallar orqali umuman boshqa mazmunda noto‘g‘ri talqin qilinmoqda.”
O‘zA