FOTOREPORTAJ
“Ishbilarmon ayol – 2023” ko‘rik-tanlovining Nukus shahar bosqichi ham yuqori saviyada tashkil qilinib, unda 30 nafarga yaqin tadbirkor va hunarmand xotin-qiz erishayotgan muvaffaqiyatini, salohiyati va imkoniyatini namoyish etdi.
– 2008 yildan buyon tadbirkorlik bilan shug‘ullanib kelaman, – deydi tanlov ishtirokchisi, “Kungrad agro – solodka sistem” MCHJ rahbari Zamira Xojametova. – Faoliyatimizni dastlab 12 kishi bilan boshlagan bo‘lsak, hozirgi kunda ishchilar soni 185 nafarga yetdi. Ayni paytda 14 davlatga qizilmiya mahsulotini eksport qilamiz. Qizilmiya ildizidan tashqari chorvachilik va 34 gektar yer maydonida bog‘dorchilik bilan ham shug‘ullanamiz.
E’tiborlisi, Zamira Qo‘ng‘irot, Taxiatosh tumanlari va Nukus shahridan 40 nafarga yaqin ehtiyojmand xotin-qizlarni kasanachilik asosida ishlab chiqarishga jalb qilgan.
Uning mana shunday sa’y-harakatlari tanlovda munosib e’tirof etildi. Shunday qilib, Zamira Xojametova 1-o‘rinni, “Oq o‘tov” hunarmandchilik markazi rahbari Bibisora Kunnazarova 2-o‘rinni, qo‘li gul hunarmand Sayyora Qosimbetova 3-o‘rinni qo‘lga kiritdi.
G‘oliblar tashkilotchilar tomonidan diplom va esdalik sovg‘alari bilan taqdirlandi.
Maqsad HABIBULLAEV(surat),O‘zA