Joriy yil 18 iyunda AQSHning Nyu-Orlean shahrida tashkil etiladigan professional boks kechasida hamyurtimiz Shahram G‘iyosov yarim o‘rta vazn toifasida amerikalik Harold Kalderonga qarshi jang o‘tkazadi. 12 raundga mo‘ljallangan mazkur uchrashuvda Shahram professional boksning WBA Eliminator jangida qatnashadi. Ushbu jang O‘zbekiston hududida qaysi telekanal tomonidan translyatsiya qilinishi e’lon qilindi, deyiladi O‘zbekiston professional boks federatsiyasi xabarida. Unga ko‘ra, bokschimiz ishtirokidagi jang translyatsiyasi huquqini ZOʼR TV telekanali qo‘lga kiritdi.
Aytish lozim, professional boksda mag‘lubiyat nimaligini bilmay kelayotgan Sh. G‘iyosovning raqibi faoliyati mobaynida 27 ta jangda qatnashib, barchasida g‘alaba qozongan bokschi hisoblanadi.
Eslatib o‘tamiz, boks oqshomining markaziy jangi yarim o‘rta vaznda WBC chempionlik kamari uchun amerikalik Reyjis Progreys (28-1-0) hamda Peru vakili Daniyelito Zorrilla (17-1-0) o‘rtasida kechadi.
T. Ro‘ziyev, O‘zA