Toshkentda “O‘zbekistonda Tyuringiya iqtisodiyoti kunlari” bo‘lib o‘tmoqda.
Mazkur haftalik o‘tkazilishi munosabat bilan Tyuringiya Federal davlatining iqtisodiyot, fan va raqamlashtirish vazirining birinchi o‘rinbosari, Davlat kotibi Karsten Feller boshchiligidagi delegatsiyasi mamlakatimizga tashrif buyurdi.
Joriy yilning 29 apreliga qadar davom etadigan ushbu haftalik doirasida Germaniya delegatsiyasi ishtirokida bir qator uchrashuv va tadbirlar tashkil etilmoqda.
Joriy “O‘zto‘qimachiliksanoat” uyushmasida o‘tkazilgan uchrashuv ulardan biridir.
Uchrashuv yakunida Tyuringiya Federal davlatining iqtisodiyot, fan va raqamlashtirish vazirining birinchi o‘rinbosari, Davlat kotibi Karsten Feller O‘zA muxbiriga intervyu berdi.
– Shuni alohida ta’kidlash kerakki, O‘zbekiston Markaziy Osiyodagi asosiy hamkorimiz hisoblanadi. Ikki davlat o‘rtasidagi aloqalar uzoq yillik an’anaga asoslanadi.
bugungi kunda mamlakatingizda ijobiy o‘zgarishlar yuz bermoqda. Biz esa bunga alohida e’tibor qaratmoqdamiz. Tashrifimiz davomida “O‘zto‘qimachiliksanoat” uyushmasi faoliyati bilan tanishdik. Ochig‘i, men keyingi yillarda sohada amalga oshirilayotgan ishlardan hayratdaman. Yaxshi strategik nuqtai nazardan yo‘naltirilgan rivojlanishga harakat qilinmoqda.
O‘zbekiston o‘zi ishlab chiqargan mahsulotini qayta ishlashga urinmoqda. Ya’ni, xomashyo chiqarmasdan, tayyor mahsulot ishlab chiqarishga alohida e’tibor qaratilmoqda.
Eksport masalasiga kelsak, Germaniya O‘zbekiston mahsulotlari uchun maqsadli eksport bozoridir. To‘qimachilik sohasi vakillari bilan uchrashuv chog‘ida Tyuringiya to‘qimachilik va polimer tadqiqotlari instituti va “O‘zto‘qimachiliksanoat” uyushmasi o‘rtasida sheriklik va hamkorlik to‘g‘risida bitim imzolandi. Ushbu shartnoma eksport sohasidagi hamkorlikka qo‘yilgan muhim qadam, deyish mumkin.
Tyuringiya to‘qimachilik va polimer tadqiqotlari instituti Germaniyaning yetakchi ilmiy muassasasidir. Bu institut yangi material ustida ish olib bormoqda. Xususan, kanop. Paxtaga qo‘shimcha ravishda kanop ham ishlatilishi mumkin. Hozir ushbu material bo‘yicha sinovlar o‘tkazilmoqda. Mana shu sohada hamkorlik qilishga harakat qilmoqdamiz.
Shuni ta’kidlash kerakki, to‘qimachilik sohasida O‘zbekiston bilan hamkorlik Germaniya uchun ham foydalidir.
O‘zA muxbiri Nasiba Ziyodullayeva
yozib oldi