Joriy yilning 1-18 mart kunlari Toshkent hamda Farg‘onada 20 yoshgacha bo‘lgan futbolchilar o‘rtasidagi Osiyo kubogi o‘yinlari dunyoning 100 ga yaqin mamlakatidagi telekanallar va internet tarmog‘i orqali namoyish etiladi.
Bu haqda O‘zbekiston futbol assotsiatsiyasida mazkur o‘yinlarni yuqori saviyada tashkil etishga bag‘ishlangan tashkiliy qo‘mita yig‘ilishida aytildi.
O‘zbekiston futbol assotsiatsiyasi raisining birini o‘rinbosari Ravshan Ermatov va Yoshlar siyosati va sport vaziri maslahatchisi Avaz Karimov ishtirokidagi yig‘ilishda musobaqaning tashkiliy masalalari ko‘rib chiqildi.
Yig‘ilish davomida o‘yinlarda ishtirok etadigan jamoalar va Osiyo futbol konfederatsiyasi vakillari va mehmonlarni kutib olish, ularga zarur sharoitlarni yaratish, mehmonxonalardagi qulayliklar, stadionlar va mashg‘ulot maydonlari sifatini ta’minlash masalalari muhokama qilindi.
Osiyo kubogi o‘yinlari jarayonida stadionlarda tomoshabinlar uchun qo‘layliklar, transport harakatini tartibga solish, jamoat xavfsizligini muvofiqlash jihatlariga e’tibor qaratildi.
Futbol ixlosmandlari diqqat markazida bo‘ladigan mazkur qit’a kubogi o‘yinlarining bir qator uchrashuvlari musobaqa taqvimiga binoan poytaxtimizdagi “Bunyodkor” o‘yingohida o‘tkazilishi belgilangan.
Aytish lozim, 34 ming nafar tomoshabinni o‘z bag‘riga sig‘dira oladigan “Bunyodkor” stadioni Osiyo kubogi guruh bosqichining 1 mart kuni bo‘ladigan O‘zbekiston-Suriya, 3 mart kungi Saudiya Arabistoni-Qirg‘iz Respublikasi, 4 mart kungi Iroq-O‘zbekiston, 6 martdagi Xitoy-Saudiya Arabistoni, 8 martdagi Koreya Respublikasi-Tojikiston o‘yinlarini qabul qiladi. Shuningdek, 11 martda o‘tkaziladigan chorak final, 15 martdagi yarim final hamda 18 mart kuniga belgilangan final uchrashuvi ham mazkur o‘yingohda tashkil etiladi.
Eslatib o‘tamiz, 20 yoshgacha bo‘lgan futbolchilar o‘rtasidagi Osiyo kubogi o‘yinlarida qit’aning 16 ta jamoasi sovrinli o‘rinlar hamda Indoneziyada o‘tadigan Jahon chempionati yo‘llanmasi uchun bahslashadi. O‘yinlar Toshkentdagi “Bunyodkor” stadioni bilan birga poytaxtimizdagi “Lokomotiv”, “JAR” va Farg‘onadagi “Istiqlol” stadionlarida o‘tkaziladi.
T.Ro‘ziyev, O‘zA