6-ноябрь күни Әжинияз атындағы Нөкис мәмлекетлик педагогикалық иниститутында 14 жастағы ер балалар арасында спорттың волейбол түринен «Дослық» кубоги жарысы болып өтти.
Оған республикамыздың барлық аймақларынан ең күшли командалар қатнасты ҳәм кубок жеңимпазлығы ушын өз-ара гүрес алып барды.
Қызықлы ҳәм кескин өткен беллесиўлер жуўмағында, Әмиўдәрья районы волейболшылары биринши орынды жеңип алып, «Дослық» кубогиниң ийесине айланды.
Бул жарыста өзлериниң жеңиске деген умтылысы менен көзге түскен төрткүлли ҳәм берунийли волейболшылар сыйлы екинши ҳәм үшинши орынларды ийелеўге миясар болды.
Жарыс соңында жеңимпазлар шөлкемлестириўшилер тәрепинен таярланған арнаўлы кубок, медаль ҳәм естелик саўғалар менен сыйлықланды.
Бүгин усы жарыс шеңберинде республикамыздың қызлары беллесиўлерге түседи.
Адилбай Оразов,
Қарақалпақстан хабар агентлиги шолыўшысы