Бүгин Футбол бойынша Европа Конференциялар лигасында жеңимпаз команданың аты мәлим болды.
Англияның «Вест Хэм» ҳәм Италияның «Фиорентина» клублары арасында өткерилген бул ойынның биринши таймында есап ашылмады. Екинши таймда болса, «Вест хэм» футболшылары күшлирек ҳәрекет ете баслады ҳәм 62-минутта пенальти ислеп алып, Саид Бенрахма пенальтиди анық әмелге асырды.
Арадан 5 минут өткенде Жакомо Бонавентура арадағы есапты теңлестириўге еристи. Бирақ, италиялылар бул есапты ойын ақырына шекем услап тура алмады.
Атап айтатуғын болсақ, Жарред Боуэн ушырасыўдың ең соңғы минутында «Фиорентина» дәрўазасына гол урып, өз клубына Европа Конференциялар лигасы кубогин алып берди.
Солай етип, Англия клубы Конференциялар кубогиниң екинши жеңимпазына айланды. 2021/22-жылғы мәўсимде бул кубокти биринши мәрте Италияның «Рома» клубы қолға киргизген еди.
А.Оразов,
Қарақалпақстан хабар агентлиги жетекши шолыўшысы