Бүгин, 24-февраль күни Өзбекстан Республикасы Жоқары ҳәм орта арнаўлы билимлендириў министри Абдуқодир Тошқулов ҳәм Өзбекстан Республикасы Халық билимлендириў министри Бахтиёр Саидов Әжинияз атындағы Нөкис мәмлекетлик педагогикалық институтына келди.
Қарақалпақстан Республикасы Халық билимлендириў министри Р.Реймов, Нөкис мәмлекетлик педагогикалық институты ректоры Б.Отемуратов ҳәм Қарақалпақ мәмлекетлик университети ректоры А.Реймов, Қарақалпақстан Республикасы Халық билимлендириў хызметкерлерин қайта таярлаў ҳәм қәнигелигин арттырыў аймақлық орайы директоры Б.Диланов, жоқары оқыў орынлары проректорлары, факультет деканлары, кафедра баслықлары, профессор-оқытыўшылар қатнасқан ушырасыўда Өзбекстан Республикасы Халық билимлендириў министрлигиниң қәнигелери усы жылдың март айынан баслап Қарақалпақстан Республикасындағы мектеплерде жумыс алып барып атырған педагог-хызметкерлердиң қәнигелигин жетилистириў бойынша әмелге асырылатуғын жумысларға тоқталды.
Март айынан баслап Өзбекстан көлеминде бириншилерден болып Қарақалпақстандағы халық билимлендириў тараўы педагогларының билим ҳәм тәжирийбесин арттырыў мақсетинде Бозатаў ҳәм Беруний районларындағы мектеплерде НМПИ менен ҚМУдың тәжирийбели профессор-оқытыўшыларын бириктирген ҳалда мобиль методикалық топарлардың жумысларын жолға қойыў бойынша жумыслар белгиленип алынды. Мобиль методикалық топарларға тиккелей ЖОО ректорлары басшы етип бекитилип, ҳәр бир топар бир айда еки мектеп жәмәәти менен мәнзилли тийкарда жумыс алып барады, яғный педагоглар ушын еки ҳәптелик интенсив оқыўлар шөлкемлестириледи. Мектеп жәмәәтиниң билимине қарай мобиль методикалық топардың жумыслары баҳаланады.
Атап өтилгениндей, ҳәзирги ўақытта Қарақалпақстандағы мектеплерде орта арнаўлы мағлыўматқа ийе 2619, улыўма категорияға ийе болмаған 18 721 педагог жумыс алып бармақта. Бул илажлар арқалы «Үзликсиз кәсиплик билимлендириў» платформасы арқалы 7 компетенция бойынша муғаллимлердиң тәжирийбеси арттырылады.
Ушырасыўда Өзбекстан Республикасы Жоқары ҳәм орта арнаўлы билимлендириў министри Абдуқодир Тошқулов ҳәм Өзбекстан Республикасы Халық билимлендириў министри Бахтиёр Саидов, жоқары оқыў орынлары ректорлары сөзге шығып, халық билимлендириў ҳәм жоқары билимлендириў министрлиги бәрқулла усындай бирге ислесиўди даўам еттириўин атап өтип, буның нәтийжесинде системада орын алып атырған айырым кемшиликлер сапластырылыўына ерисиў мүмкинлигин атап өтти.
Ушырасыў өз ара пикир алысыўлар менен даўам етти.
Ислам Матеков,
Қарақалпақстан хабар агентлигиниң шолыўшысы.
Автордың түсирген фотолары.