Хабарыңыз бар, Өзбекстан Республикасы Министрлер Кабинети жанындағы Билимлендириўдиң сапасын қадағалаў мәмлекетлик инспекциясы тәрепинен Өзбекстанда жумыс алып барып атырған жоқары оқыў орынлары ҳәм филиалларының 2020-жылдағы миллий рейтинги нәтийжелерин жәриялаған еди. Қуўанарлысы филиаллар рейтингинде улыўма 27 жоқары оқыў орынлары филиалы арасында Өзбекстан мәмлекетлик көркем өнер ҳәм мәденият институты Нөкис филиалы жоқары беслик көрсеткишлери арасында болыўы жәмәәтимиз ушын үлкен мақтаныш есапланады.
Өзбекстан мәмлекетлик көркем өнер ҳәм мәденият институты Нөкис филиалында өткен жылдың рейтинг нәтийжелери ҳәм 2021-жыл ушын рейтинг көрсеткишлерин жетилистириў мәселелерине бағышланған илаж болып өтти.
Мәжилисте филиал директоры А.Аяпов быйылғы жылдың миллий рейтинг нәтийжелерин белгилеўде есапқа алынатуғын ҳәр бир бәнтке айрықша токтап өтип, бул бағдардағы жумысларды еле де жетилистириў кереклигин атап өтти.
Илаж соңында рейтинг көрсеткишин анықлаўда ислениўи тийис болған жумыслар бойынша пикир-усыныслар билдирилип, алдағы ўазыйпалар белгиленип алынды.
ӨзМКӨМИ Нөкис филиалы баспасөз хызмети.
Қарақалпақстан хабар агентлиги