Әжинияз атындағы Нөкис мәмлекетлик педагогикалық институтының ректоры Байрам Отемуратов Россия Федерациясындағы билимлендириў тараўы бойынша рейтинги жоқары болған жоқары оқыў орынлары менен еки тәреплеме бирге ислесиўди күшейтиў мақсетинде хызмет сапарында болып турғаны ҳаққында хабар берген едик.
НМПИ ректоры Сочи мәмлекетлик университетинде болып, университет ректоры, профессор Галина Романова менен ушырасты.
Ушырасыўда Россия ҳәм Өзбекстанның жоқары билимлендириў системасындағы бирге ислесиўиниң нәтийжелери, бүгинги жағдайы ҳәм алдағы ўазыйпалар ҳаққында пикир алмасылды.
НМПИ ректоры Б.Отемуратов Сочи мәмлекетлик университетиниң бакалавр таярлаў бағдарламасы, соның ишинде, туризм тараўы бойынша кадрлар таярлаўда жоқары нәтийжелерге ерисип киятырғанын айрықша атап өтип, бул бойынша Нөкис мәмлекетлик педагогикалық институты менен биргеликте экологиялық, зыярат, аўыл хожалығы ҳәм мийманхана хызмети туризм бағдарлары бойынша бакалаврлар таярлаў перспективалары бойынша сөйлесиўлер алып барды.
Ушырасыў соңында Сочи мәмлекетлик университети ҳәм Нөкис мәмлекетлик педагогикалық институты арасында илимий-педагогикалық жумысларда бирге ислесиў бойынша шәртнамаға қол қойылды.
Ислам Матеков,
Қарақалпақстан хабар агентлигиниң шолыўшысы.