Жынаят ислери бойынша Нөкис районы судының усы жыл 28-апрель күнги суд мәжилисинде үш пуқараның иси көрип шығылып, Өзбекстан Республикасы Жынаят Кодексиниң 73-статьясына тийкарланып, мүддетинен бурын шәртли рәўиште азат етилди.
Пуқара О. Қосжанов «Нексия» маркалы атомашинасы менен 2018 жыл 17-июнь күни Кегейли районы «Еркиндәрья» аўыл пуқаралар жыйыны аймағында пуқара Е.Крейовты қағып алған. Нәтийжеде Е.Крейов ўақыя болған жерде қайтыс болған. Сонлықтан ол Кегейли районы судының 2018-жыл 8-октябрь күнги хүкими менен Өзбекстан Республикасы Жынаят Кодексиниң 266-статьясы 2-бөлими менен
3 жыл мүддетке дүзетиў иси жазасына судланған.
Бозатаў районы ишки ислер бөлиминиң О.Қосжановты өтелмей қалған жазасынан мүддетинен бурын шәртли раўиште азат етиўди өтиниш хаты көрип шығылды. Мәлим болғанындай, судланған Оразатдин Қосжанов жазасын өтеў дәўиринде өзин жақсы тәрептен көрсетип, жасаў ҳәм жумыс орнынан жақсы минезлемеге ийе болған ҳәм ислеген жынаятының ақыбетин түсинип, дүзелиў жолына түскен. Усыларды есапқа алған ҳалда, бул пуқара Өзбекстан Республикасы Жынаят Кодексиниң 73-статьясына тийкарланып өтелмей қалған 1 жыл 9 ай жазасынан мүддетинен бурын шәртли рәўиште азат етилди.
Пуқара Сабитов Жумабай Турдыбаевич 2019-жыл 15-июль күни Нексия маркалы атомашинасы менен Нөкис районы «Такыркөл» аўыл пуқаралар жыйыны аймағында пуқара Н.Артықбаевты қағып алған. Усының ақыбетинде Н.Артықбаев ўақыя болған жерде қайтыс болған. Нәтийжеде ол Нөкис қалалық судының 2019-жыл 24-сентябрь күнги хүкими менен Өзбекстан Республикасы Жынаят Кодексиниң 266-статьясы 2-бөлими менен 1 жыл 6 ай мүддетке дүзетиў иси жазасына судланған.
Нөкис районы ишки ислер бөлиминиң Ж.Сабитовты өтелмей қалған жазасынан мүддетинен бурын шәртли рәўиште азат етиўди сораған өтиниш хаты Нөкис районы судында көрип шығылды. Судланған Сабитов Жумабай Турдыбаевич жазасын өтеў дәўиринде өзин жақсы тәрептен көрсетип, жасаў ҳәм жумыс орнынан жақсы минезлемелерге ийе болғанлығы, ислеген жынаятының ақыбетин түсинип, дүзелиў жолына түскенлиги себепли Өзбекстан Республикасы Жынаят Кодексиниң 73-статьясына тийкарланып өтелмей қалған 11 ай 19 күн жазасынан мүддетинен бурын шәртли рәўиште азат етилди.
Пуқара Ержанов Инамжан Жиемуратович, 2019 жыл 5-май күни Нөкис районы, «Атамакан» ресторанында спиртли ишимлик ишкен мас халында жәмийетлик орында Г.Бекбергенованы урып, оған жарақат жеткерген. Сонлықтан ол Шымбай районы судының 2019-жылы 23-сентябрь күнги хүкими менен Өзбекстан Республикасы Жынаят Кодексиниң 277-статьясы 3-бөлими «а,г» бәнтлери менен 1 жыл 6 ай мүддетке еркинликтен шеклеў жазасына судланған.
Нөкис районы ишки ислер бөлиминиң И.Ержановты өтелмей қалған жазасынан мүддетинен бурын шәртли раўиште азат етиўди сораған өтиниш хаты тийкарында оның иси жынаят ислери бойынша Нөкис районы судында көрилди. Судланған Ержанов Инамжан Жиемуратович жазасын өтеў дәўиринде өзин жақсы тәрептен көрсетип, жасаў ҳәм жумыс орнынан жақсы минезлемелерге ийе болғанлығы ҳәм ислеген жынаятының ақыбетин түсинип, дүзелиў жолына түскенлиги себепли, Өзбекстан Республикасы Жынаят Кодексиниң 73-статьясына тийкарланып өтелмей қалған 11 ай 13 күн жазасынан мүддетинен бурын шәртли рәўиште азат етилди.
Азат СЕЙТАНОВ,
Жынаят ислери бойынша Нөкис районы судының баслығы.
Қарақалпақстан хабар агентлиги.