Бердақ атындағы Қарақалпақ мәмлекетлик университети ректораты тәрепинен 27-октябрь күни студентлер үйиндеги жаслардың бос ўақытларын мазмунлы өткериў мақсетинде мәдений илаж өткерилип, байрам дастурханы жайылды.
Илажда университеттиң Жаслар мәселелери ҳәм руўхый-ағартыўшылық ислери бойынша проректоры С.Алаўатдинов студентлер үйиндеги жаслар менен бир дастурхан әтирапында сәўбетлесип, пикир-усынысларын тыңлады. Студент-жаслар университет ректоратына жаратылған имканиятлар ушын өз миннетдаршылығын билдирди.
Байрам дәстүри спорт жарыслары ҳәм көркем өнер факультети жаслары тәрепинен таярланған концерт бағдарламасы менен даўам етти.
Бундай мәдений ҳәм спорт илажлары студент-жаслардың жәмийетлик белсендилигин арттырыў, олардың арасында өз-ара дослық ҳәм аўызбиршиликти беккемлеўге хызмет етеди ҳәм саламат турмыс тәризин үгит-нәсиятлаўда, бос ўақытларын мазмунлы өткериўде айрықша әҳмийетке ийе.
Арыўхан Нуратдинова,
Хатира Турсынгалиева,
ҚМУ, Журналистика тәлим бағдарының 4-курс студентлери
Қарақалпақстан хабар агентлиги