Өзбекстан Республикасы Президенти Шавкат Мирзиёев 29-июнь күни Түркмен халқының миллий жетекшиси, Түркменстан Халық Мәсләҳәтиниң Баслығы Гурбангули Бердимуҳамедов пенен телефон арқалы сөйлести.
Сөйлесиў алдынан мәмлекетимиз басшысы Гурбангули Бердимуҳамедовты туўылған күни менен қызғын қутлықлап, оған беккем денсаўлық, бахыт-ығбал ҳәм үлкен табыслар, туўысқан түркмен халқына тынышлық-парахатшылық ҳәм раўажланыў тиледи.
Оның бүгинги Түркменстанды раўажландырыў, мәмлекетлеримиз арасында дослық, жақсы қоңсышылық ҳәм стратегиялық шериклик қатнасықларын беккемлеўге қосып атырған салмақлы үлеси айрықша атап өтилди.
Өзбекстан ҳәм Түркменстан жетекшилери Қурбан ҳайыты менен бир-бирин қызғын қутлықлады. Өзбекстан Президенти жаңа Аркадағ қаласының рәсмий ашылғаны мүнәсибети менен де Гурбангули Бердимуҳамедовты қутлықлады.
Телефонда сөйлесиў ўақтында мәмлекетлеримиз арасында саўда, инвестициялар, санаат, энергетика, аўыл хожалығы ҳәм транспорт тараўларында көп қырлы бирге ислесиўди буннан былай да кеңейтиў мәселелери додаланды. Барлық дәрежелерде нәтийжели сөйлесиўлер, аймақлараралық ҳәм мәдений-гуманитарлық алмасыўлардың жеделлескени атап өтилди.
Регионаллық бирге ислесиўдиң әҳмийетли тәреплери көрип шығылды.
ӨзА