Маржанкөл мәкан пуқаралар жыйыны Тахтакөпир районының ең шетки аймақларының бири болып, быйылғы жылы елатта «Абат аўыл» мәмлекетлик бағдарламасы тийкарында көплеген қурылыс ҳәм абаданластырыў жумыслары әмелге асырылды. Атап айтатуғын аймақта ишки көшелерге шағыл-тас араласпасы төселип, ишимлик суў тармақлары тартылды. Электр линиялары жаңаланып, оларға бетон бағаналар орнатылды.
Жыйын орайындағы 21-санлы улыўма орта билим бериў мектебине 2021-жылы капитал оңлаў жумыслары жүргизилди.
Күни кеше Маржанкөл турғынлары турмысында және бир әҳмийетли ўақыя жүз берди. Атап айтатуғын болсақ, өсип киятырған жас әўладтың заман талабына сай тәлим-тәрбия алыўын тәмийинлеў мақсетинде, жоқарыда аты аталған Мәмлекетлик бағдарлама тийкарында 90 балаға мөлшерленген 16-санлы мектепке шекемги билимлендириў шөлкеминиң имараты пайдаланыўға берилди.
Усы мүнәсибет пенен жыйын аймағында жаңа балалар бақшасының ашылыў мәресими болып өтип, онда район ҳәкими Ж.Адилов, Қарақалпақстан Республикасы Мектепке шекемги билимлендириў министриниң орынбасары Т.Байжанов ҳәм аймақ жас үлкенлери имараттың ашылыўы менен бақша жәмәәтин қызғын қутлықлап, қолы гүл қурылысшыларға өз миннетдаршылықларын билдирди.
Соңынан имарат алдына тартылған дәстүрий лента кесилип, илаж қатнасыўшылары жаңа бақшада жаратылған имканиятлар менен жақыннан танысты.
-Аймағымызда 102 хожалықта 500 ден аслам халық тыныш-татыў өмир сүрмекте,-дейди бизге жыйын баслығы Мадий Қонысбаев.- «Абат аўыл» мәмлекетлик бағдарламасы тийкарында быйылғы жылы көплеген жумыслар әмелге асырылды. Буның нәтийжесинде аўыл халқының турмысы жақсыланып, көше ҳәм қыябанларымыз абаданласпақта. Жаңа жумыс орынлары ашылып, халық бәнтлиги тәмийинленбекте. Халқымызға көрсетилип атырған бул қоллап-қуўатлаў ҳәм ғамқорлықлар ушын республика ҳәм район басшыларына үлкен рахмет айтаман.
Мағлыўмат ушын айтып өтетуғын болсақ, бул имаратқа «Реверстрой» жәмийети қурылысшылары тәрепинен 1млрд 450 млн сумлық реконструкция жумыслары алып барылды ҳәм бүгинги күни бақшада 40 бала тәлим тәрбия алмақта.
Адилбай Оразов,
Қарақалпақстан хабар агентлиги шолыўшысы