Кеше футбол бойынша Европа чемпионлар лигасының «В», «С» ҳәм «D» топарларында 5-тур ойынлары болып өтти.
«C» топарында плей-офф жолламасы ушын гүрес жүргизип атырған «Интер» өз майданында «Виктория»ны қабыллап, 4: 0 есабында жеңиске еристи ҳәм келеси басқыш жолламасын қолға киргизди.
Ал, турнир фаворитлеринен бири «Барселона» болса әзелий қарсыласларының бири «Бавария» менен күш сынасып, күтилмегенде ири есапта жеңилиске ушырады. Есап 0:3 ҳәм «Барселона» ендиги жағында Европа лигасында ойнайтуғын болды.
«В» топарында жетекшилик ушын өз-ара беллесиў алып барып атырған «Порту» өз майданында Бельгияның «Брюгге»си менен ушырасып, 4:0 есабында жеңиске еристи. Бул ойында иранлы Меҳди Тареми еки гол урыўға миясар болды.
Бул ойыннан соң «Брюгге» 10 упай менен 1-орынды, «Порту» болса, 9 упай менен 2-орынды ийелеп келеси басқыш жолламасын қолға киргизди.
Англияның «Тоттенхэм» клубы болса Португалияның «Спортинг»и менен ойынға түсип, 1:1 есабындағы нәтийжени көрсетти.
Ал, Германияның «Айнтрахт» клубы «Марсель» футболшылары менен ушырасып, 2:1 есабында жеңиске еристи.
Футбол жанкүйерлери ушын қызық тәрепи сонда, бул топарда «Тоттенхэм» 8 упай менен топарда жетекшилик етип киятырған болса, «Спортинг» ҳәм «Айнтрахт» 7 упай менен 2-3-орынларды ийелеп тур.
Ең соңғы орында киятырған «Марсель» клубында да келеси басқыш жолламасын қолға киргизиў имканияты бар. Француз клубы есабында ақырғы тур алдынан 6 упай бар.
А.Оразов,
Қарақалпақстан хабар агентлиги шолыўшысы.