Бүгин Қарақалпақстан Республикасы Жоқарғы Кеӊесиниӊ депутаты, Бердақ атындағы Қарақалпақ университети ректоры А.Реймов Нөкис қалалық Халық билимлендириў бөлимине қараслы 24-санлы улыўма орта билим бериў мектебинде өткерилген питкериўшилердиӊ «Соӊғы қоӊыраў» кешесине қатнасты.
Кешеде университет ректоры профессор А.Реймов тәрепинен Ҳүрметли Президентимиз Ш.Мирзиёевтиӊ питкериўши жасларға жоллаған байрам қутлықлаўы оқып еситтирилди ҳәм мектеп питкериўшилерин бүгинги байрам менен қутлықлап, олардыӊ быйылғы жылы жоқары оқыў орынларына кириўи ҳәм келешекте ата-анасы менен бирге елимиздиӊ мақтанышына айланатуғын оқымыслы жетик кадрлар болып жетилисиўине тилек билдирди.
Кешеде билимлендириў тараўында жемисли мийнет етип киятырған бир қатар муғаллимлер ҳәм мектепти айрықша баҳаларға питкерип атырған питкериўшилерге Ҳүрмет жарлықлары ҳәм естелик саўғалар тапсырды. Илажда соӊғы қоӊыраў қағылып, мектеп оқыўшылары тәрепинен таярланған концерт бағдарламасы қойып берилди.
Адилбай Оразов,
Қарақалпақстан хабар агентлиги шолыўшысы