Өзбекстан Республикасы Ишки ислер министрлигиниң усы жыл 25-марттағы бийлигине муўапық 2-апрельден 2-май күнлери аралығында Ишки ислер уйымларында «Руўхыйлық айлығы» илажы өткерилмекте.
Усы мүнәсибет пенен Өзбекстан Республикасы Ишки ислер министрлиги Руўхый-ағартыўшылық жумыслар ҳәм кадрлар менен тәмийинлеў департаменти Социаллық қорғаў басқармасының баслығы, подполковник Одилбек Якубов, Қаржы ҳәм материаллық-техника тәмийнаты департаменти баслығының орынбасары, подполковник Шерзод Қурбанов басшылығындағы жумысшы топар келип, Жазыўшылар аўқамы, Өзбекстан жаслар аўқамы Қарақлпақстан Республикасы Кеңеси, «Ватанпарвар» шөлкеми, Шаңарақ ҳәм ҳаял-қызлар комитети, Мәденият, Спортты раўажландырыў министрликлери хызметкерлери қатнасында әмелге асырылыўы тийис болған жумыслар режелестирилип алынды.
«Ўатанға ҳәм халыққа садықлық пенен хызмет етиў жоқары миннетимиз» сүрени астында өткерилип атырған «Руўхыйлық айлығы» шеңберинде уллы сәркарда Әмир Темурдың туўылғанының 686 жыллығы мүнәсибети менен Қарақалпақстан Республикасы Ишки ислер министрлигинде «Әмир Темур дәўиринде илим ҳәм мәденият» атамасында руўхый-ағартыўшылық илаж болып өтти. Онда Өзбекстан Республикасы Ишки ислер министрлиги «Темурбеклер мектеби» әскерий-академиялық лицейи оқытыўшылары тәрепинен уллы сәркарданың өмири ҳәм әскерий салтанаты, мәмлекет басқарыў тәртиби ҳаққында кең түрде түсиник берилди. Хызметкерлер өзлерин қызықтырған сораўларға жуўап алды. Илаж соңында бир қатар хызметкерлериге гезектеги арнаўлы дәрежелер берилди.
Қарақалпақстан Республикасы Ишки ислер министрлигинде, Өзбекстан Республикасы Ишки ислер министрлиги Қарақалпақ академиялық лицейинде Қарақалпақстан Республикасы Конституциясы қабыл етилгениниң 29 жыллығына бағышланған байрам илажлары өткерилди. Онда Қарақалпақстан Республикасы Әдиллик министрлигиниң қәнигелери тәрепинен пуқаралардың ҳуқықлары ҳәм нызамлы мәплерин қорғаўдағы әҳмийети бойынша баянатлар жасалды.
Министрликтиң Патрул-пост хызмети ҳәм жәмийетлик тәртипти сақлаў басқармасы, Қоңырат ҳәм Шоманай районлары Ишки ислер бөлимлери жеке қурамы арасында сап тартып жүриўди көзден өткериў ҳәм таярлығы, табель қуралларын толықсыз бөлеклерге ажыратыў ҳәм жыйнаў шынығыўлары, қолланыў бойынша шеберлик сабақлары өткерилди. Сондай-ақ, китап ярмаркалары шөлкемлестирилди.
Ишки ислер министрлиги тараўлық хызметлер ҳәм районлық Ишки ислер бөлимлери хызметкерлери арасында мини футбол бойынша «Министр кубоги» жарысы өткерилди. Онда 8 команда қатнасты. Биринши орынды оператив ўазыйпаларды орынлаўшы көшпели отряды, екинши орынды Қарақалпақстан Республикасы Ишки ислер министрлиги сайланды командасы, үшинши орынды Тахтакөпир районы Ишки ислер бөлими командалары ийеледи. Жеңимпазларға министрликтиң дипломы ҳәм естелик саўғалары тапсырылды. Сондай-ақ, миллий гүрес, шахмат бойынша жарыслар, тараўда хызмет атқарып атырған ҳаял-қызлар арасында «Зәкаўат» интеллектуаллық ойыны бәршеде айрықша қызығыўшылық оятты.
Қарақалпақстан Республикасы Ишки ислер министрлиги Баспасөз хызметиниң хабар бериўинше, «Руўхыйлық айлығы» шеңбериндеги илажлар даўам етпекте.
Д.АБИБУЛЛАЕВ,
Қарақалпақстан хабар агентлигиниң шолыўшысы