Иорданияда спорт курашлари бўйича U17 ёш тоифасида ўтказилаётган жаҳон чемпионатининг юнон-рум кураши баҳсларида тўрт нафар полвонимиз бронза медалини қўлга киритди.
Чемпионатнинг -45 кг вазн тоифасида мамлакатимиз шарафини ҳимоя қилган Умиджон Каромов бронза медалига эга чиқиш учун эронлик Муҳаммад Бадраддин билан рақобатлашди. Кескин ва муросасиз баҳсларга бой ўтган беллашувда Умиджон 9:1 ҳисобида рақиби устидан зафар қучди.
-60 кг. вазн тоифасидаги полвонимиз Фаррух Йўлдошев нидерландиялик Илиас Лавоинани, Беҳрузбек Валиев эса -71 кг. вазн тоифасида арманистонлик Самвель Тертерянни таслим этиб, жаҳон чемпионатининг бронза медали билан тақдирланди.
Шунингдек, вазни 92 килограммгача бўлган юнон-рум курашчилари орасида мамлакатимиз шарафини муносиб ҳимоя қилган Фахрикамол Комилжонов ўтиш беллашувларида дастлаб хорватиялик Патрик Будорни, иккинчи беллашувда нейтрал курашчи Константин Касянни мағлуб этди. Жаҳон чемпионати бронза медали учун баҳсда эса Фахрикамол арманистонлик Лёва Шукиянни мағлуб этди.
Шу тариқа, юнон-рум кураши бўйича ўтказилган беллашувларда терма жамоамиз аъзолари 1 та кумуш ва 5 бронза медалини жамғарди.
Жавоҳир Тошхўжаев,
ЎзА