Миллий спорт туримиз курашнинг халқаро майдондаги оммалашувида чет давлатларда ташкил этилаётган миллий федерацияларнинг ўрни беқиёс. Зотан, кураш мусобақаларининг ўтказилиши орқали ўзбекона сўзларнинг хорижий мамлакат спорт майдонларида жаранглаши, халқимизга хос ибораларнинг қўлланилиши азалий қадриятларимизнинг янгича талқинда ривож топаётганини англатади.
Бу, Ўзбекистон Республикаси Президенти томонидан имзоланган “Кураш миллий спорт турини ривожлантириш ва унинг халқаро нуфузини янада ошириш чора-тадбирлари тўғрисида”ги қарор ижросининг ёрқин ифодаси бўлмоқда.
Халқаро кураш ассоциацияси хабарига кўра, Мексика кураш федерацияси вакилларининг саъй-ҳаракатлари туфайли кураш мамлакатнинг кўплаб минтақаларидаги спорт клубларида ташкил этилади.
Мексика спорт вазирлиги ва бошқа расмий ташкилотлар ҳамкорлигида жорий йилнинг 30 июль куни Мексика пойтахтининг Гондурас секторидаги Лагунилья спорт мажмуасида кураш бўйича очиқ турнир ташкил этилади.
Мексика кураш федерацияси президенти Хуан Хосе Круз Сантилланнинг сўзларига кўра, ушбу турнир Мексикада “кураш” терминологиясининг расмий қўлланилишидаги илк қадам бўлиб тарихга кирмоқда.
Т.Рўзиев,
ЎзА