«O‘zsuvta’minot» АЖ «Коррупцияга қарши курашиш менежмент тизими» мавжудлигини тасдиқловчи халқаро ISO 37001:2016 ва «Сифат менежмент тизими» мавжудлигини тасдиқловчи халқаро ISO 9001:2015 сертификатларига эга бўлди.
Бугунги кунда «O‘zsuvta’minot» акциядорлик жамияти томонидан соҳада коррупциянинг олдини олиш, унга қарши курашиш ва чек қўйишга оид кенг кўламли ишлар амалга оширилмоқда. Мазкур йўналишда бир қатор халқаро ва маҳаллий ташкилотлар билан ҳамкорлик ҳам йўлга қўйилган.
Ўзбекистон Республикаси Президентнинг 2019 йил 27 майдаги «Ўзбекистон Республикасида коррупцияга қарши курашиш тизимини янада такомиллаштириш чора-тадбирлари тўғрисида»ги фармонида белгиланган талаблар асосида акциядорлик жамиятида комплеанс назорат тизими ташкил этилган. Бугунги кунда бундай назорат Жамиятнинг 17 та тизим ташкилотларида ҳам жорий этилган.
– «CERT International» халқаро сертификатлаштириш органи томонидан мазкур сертификатлар ўз-ўзидан берилгани йўқ, – дейди «O‘zsuvta’minot» АЖ бошқаруви раиси Соҳиб Саифназаров. – Коррупцияга қарши курашишга қаратилган 30 дан ортиқ ички меъёрий ҳужжатлар қабул қилинди. Бундан ташқари, Жамият ва унинг тизим ташкилотларида фаолият юритаётган ходимларда коррупцияга нисбатан муросасиз муносабатни шакллантириш, уларнинг ҳуқуқий онги ва маданиятини янада юксалтириш мақсадида ўтган йилда ҳуқуқ-тартибот органлари ходимлари иштирокида тарғибот-ташвиқот тадбирлари ўтказилди. Бу халқаро эътироф этилган сертификатлар корхонамизнинг инвестицион жозибадорлигини ошириб, халқаро молия институтларининг бизга бўлган ишончи кучайишига хизмат қилади.
«CERT International» компанияси халқаро аудитори Риад Ибрагимов сертификатларни топширар экан, сўнгги йилларда сув таъминоти соҳасида улкан ўзгаришлар рўй берганини, коррупцияга қарши курашишда ҳам натижаларга эришилаётганини, бу эса, ўз навбатида сув таъминоти корхоналари ва истеъмолчилар ўртасидаги алоқалар янада мустаҳкамланишига туртки бўлаётганини қайд этди.
Акциядорлик жамиятига ушбу сертификатларнинг топширилиши сув таъминоти соҳасида коррупциянинг олдини олиш чоралари кўрилаётганидан, тизимда очиқлик ва шаффофлик таъминланаётганидан далолат беради.
ЎзА