Суд қарори билан ўз уйидан мажбурий кўчирилиши белгиланган Олга Абдуллаева, Олий Мажлиснинг Инсон ҳуқуқлари бўйича Вакили (омбудсман)нинг хулосаси билан куни кеча Олий суд Раёсатида ютиб чиқди.

Гап шундаки, тадбиркор Олга Абдуллаева истиқомат қиладиган ҳудуддан ер сотиб олган ва бу бўйича ҳоким қарори ҳам чиқарилган. Шундан сўнг, тадбиркор ўша ҳудудда яшовчи оилаларга конпенсация ёки бошқа уй-жой таклиф қилган. Лекин, даъвогар бунга розилик бермагани сабабли ишбилармон туман фуқаролик ишлари бўйича судига Олга Абдуллаева ва оила аъзоларининг мажбурий кўчирилишини сўраб мурожаат қилади. Иш тадбиркор фойдасига ҳал қилинади. Тошкент шаҳар суди аппеляция инстанциясининг 2020 йил март ойидаги ва Олий суд судьясининг октябрь ойидаги ажрими ҳам тадбиркор фойдасига ҳал бўлади.

Жорий йилнинг октябрь ойида Олга Абдуллаева Олий Мажлиснинг Инсон ҳуқуқлари бўйича Вакили (омбудсман)га ўзининг шахсий мулкка бўлган ҳуқуқларини ҳимоя қилишда ёрдам сўраб мурожаат қилган эди. Ушбу мурожаат Омбудсман институти ходимлари томонидан ўрганилиб, мурожаат юзасидан қуйи суд қарорларини бекор қилиб, адолатли қарор чиқариш бўйича Олий суд раиси номига хулоса киритилган.

Жорий йилнинг 29 декабрь куни Олий суд Раёсати очиқ суд мажлисида суд ишида келтирилган низоли ерга берилган кадастр ҳужжатларининг номутаносиблиги сабабли, қуйи судлар чиқарган қарорларни бекор қилди. Эндиликда мазкур иш фуқаролик ишлари бўйича суди 1-инстанциясида қайтадан мазмунан кўриб чиқилади.

Ушбу суд мажлисларида ҳам Олий Мажлиснинг Инсон ҳуқуқлари бўйича Вакили (омбудсман)нинг масъул ходимлари иштирок этиб, жараённи кузатиб боради.

Олий Мажлиснинг Инсон ҳуқуқлари бўйича

Вакили (омбудсман) Ахборот хизмати