Тадбирда давлат раҳбарининг ташқи сиёсат бўйича ёрдамчиси, миллий хавфсизлик бўйича вице-президент маслаҳатчиси Кейт Келлог ва президент ёрдамчиси, Миллий хавфсизлик кенгашининг Жанубий ва Марказий Осиё бўйича катта директори Лиза Кертис ҳам иштирок этди.
Суҳбат аввалида Ўзбекистон – АҚШ алоқалари изчил ривожланиб бораётгани қайд этилди. Биргаликдаги саъй-ҳаракатлар туфайли сўнгги йилларда икки томонлама ва минтақавий кун тартибидаги барча соҳаларда сезиларли ютуқларга эришилди.
Томонлар сиёсий мулоқот кўламини кенгайтириш, савдо-иқтисодий, маданий-гуманитар, хавфсизлик соҳасидаги ҳамкорликни мустаҳкамлаш бўйича фикр алмашдилар.
Афғонистонда тинчлик ва барқарорликни қўллаб-қувватлаш масаласи муҳимлигига алоҳида эътибор қаратилди. Оқ уй вакили Ўзбекистоннинг АИРда тинчлик музокараларини илгари суриш, ушбу мамлакатни ижтимоий-иқтисодий жиҳатдан тиклашга қўшаётган ҳиссасини эътироф этди. Пандемия пайтида кўрсатилган инсонпарварлик ёрдами, мамлакатни минтақа давлатлари билан интеграциялашуви мунтазам қўллаб-қувватланаётгани олқишланди.
Ҳозирги вазият Афғонистонда энергетика ва транспорт-коммуникация соҳаларидаги муҳим лойиҳаларни молиялаштиришнинг мақбул йўли, манбаларини топишни талаб этиши алоҳида таъкидланди.
Мажлисда умумий кун тартибининг бошқа масалалари ҳам кўриб чиқилди.
ЎзА