Ўзбекистон Республикаси Аxборот теxнологиялари ва коммуникацияларини ривожлантириш вазирлиги ҳамда Вазирлик ҳузуридаги Ахборот хавфсизлиги ва жамоат тартибини таъминлашга кўмаклашиш маркази, Тошкент ахборот технологиялари университети ҳамда “UNICON.UZ” давлат унитар корхонаси томонидан ташкил этилган анжуманда давлат ва хўжалик бошқаруви органлари ва маҳаллий давлат ҳокимияти органларининг АКТ бўйича масъул раҳбарлари, ахборот хавфсизлигини таъминлашга масъул ходимлари, Ахборот хавфсизлиги ва жамоат тартибини таъминлашга кўмаклашиш маркази мутахассислари, тегишли вазирлик ва ташкилот вакиллари, соҳада фаолият юритувчи кўплаб экспертлар, оммавий ахборот воситалари ходимлари, талабалар ҳамда ёш тадқиқотчилар иштирок этди.

Шу билан бирга конференцияда ўз маҳсулотлари билан чет эл компаниялари, жумладан Россия Федерацияси, Корея Республикаси ва Исроил давлатидан етук мутахассисларнинг қатнашиши алоҳида эътиборга молик.

Конференция мамлакатимиз ва дунё миқёсида ахборот-коммуникация технологиялари жадал ривожланиб бораётган бир даврда, давлат ва хўжалик бошқаруви ҳамда маҳаллий давлат ҳокимияти органларида ахборот хавфсизлиги ҳамда киберхавфсизликни таъминлаш масалаларига қаратилгани билан аҳамиятлидир. Шунингдек, мазкур йўналишнинг ўта долзарблиги инобатга олиниб, ахборот хавфсизлиги ҳамда киберхавфсизликни таъминлаш бўйича юзага келаётган муаммоларга ечим топиш, келгусида ушбу соҳани ривожлантиришга қаратилган комплекс чора-тадбирларни амалга оширишда янгича ёндашувлар, механизмлар хусусида ўзаро фикр алмашиш кўзда тутилган.

Бугунги кунда юртимизда ахборот хавфсизлиги ҳамда киберхавфсизликни таъминлаш масалаларига алоҳида эътибор қаратилмоқда. Жумладан, ахборот хавфсизлиги соҳасида ишлаб чиқилаётган ва такомиллаштирилаётган қонунлар ва қонуности ҳужжатлари бунга яққол мисол бўла олади.

Ахборот-коммуникация технологияларини ривожлантириш ҳамда ушбу жараёнда шахс, жамият ва давлатнинг ахборот хавфсизлиги ҳамда киберхавфсизликни таъминлаш масалалари мамлакатнинг устувор стратегик ва умуммиллий вазифаси ҳисобланиб, давлат ва жамият томонидан ўзаро муштарак, биргаликда саъй-ҳаракатларни амалга оширилишини талаб этади. Вазирлик ва идоралар, корхона ва ташкилотлар, бизнес тузилмаларининг ахборот хавфсизлиги ҳамда киберхавфсизликни таъминлаш, мамлакатимизнинг миллий манфаатларига хизмат қилиш демакдир. Бу, айниқса, миллий хавфсизликка таҳдидлар ахборот макони ва муҳити орқали амалга оширилаётган бир паллада янада яққол намоён бўлади.

Конференция доирасида давлат ва хўжалик бошқаруви ҳамда маҳаллий давлат ҳокимияти органларининг ахборот хавфсизлиги ҳолати, киберхавфсизлик масалалари, ахборот тизимлари ва ресурсларини ахборот хавфсизлиги ҳодисалари бўйича мониторинги ва серверларда ўрнатилган дастурий таъминотлардаги заифликлар тўғрисида автоматик огоҳлантириш тизими каби мавзуларда маърузалар тингланди.

Конференциянинг иккинчи куни ахборот хавфсизлиги ҳамда киберхавфсизлик муаммолари ва уларнинг ечимлари ҳақида миллий ва чет эл компаниялари мутахассислари ўзлари томонидан ишлаб чиқилган ва татбиқ этилаётган ечимлар ҳақида тўхталиб ўтади.