“Қорақалпоқ миллий либослари” кўргазмаси ташкил этилди

Ўзбекистон Бадиий академияси Қорақалпоғистон Республикаси бўлими кўргазмалар саройида Ватанимиз мустақиллигининг 26 йиллигига бағишлаб, “Қорақалпоқ миллий либослари” кўргазмаси ташкил этилди.

Қорақалпоғистон Республикаси Жўқорғи Кенгеси қўмита раиси Д.Қурбонниёзов, Қорақалпоғистон Республикаси Маданият вазири П.Айтмуратов, Ўзбекистон “Миллий тикланиш” демократик партияси Қорақалпоғистон Республикаси кенгаши раиси Т.Романов ва бошқалар мустақиллик йилларида бой меросимиз, миллий қадриятларимизни тиклаш, янада бойитиш ва ривожлантириш, келгуси авлодларга бус-бутун етказиш борасида кенг кўламли ишлар амалга оширилаётганини таъкидлади.

Айниқса, миллий ҳунармандлик тез суръатларда ривожланиб, қўл меҳнатидан яралган буюмлар, миллий каштачилик санъати негизида тайёрланган либослар, миллий андозадаги кийим-кечаклар урфга айланмоқда.

9 (2).jpg

Қорақалпоғистон Республикаси Маданият вазирлиги, Ўзбекистон “Миллий тикланиш” демократик партияси Қорақалпоғистон Республикаси кенгаши, Савдо-саноат палатаси ҳамда “Ҳунарманд” уюшмаси Қорақалпоғистон Республикаси бошқармалари ҳамкорлигида ташкил этилган кўргазмада ёш дизайнер ва миллий каштачилик санъати усталари, моҳир тикувчилар томонидан миллий ва замонавий уйғунликда яратилган либослар намойиш этилди. Истеъдодли ёш дизайнер Ойбўлған Давлетназарованинг замонавий андозадаги кийим-кечакларга туширган қорақалпоқ миллий безаклари, ёшлар учун яратган либослар коллекцияси, тажрибали дизайнер Гулнора Ембергенова томонидан тақдим этилган тўн ва келин-куёвлар учун миллий либослар барчада катта қизиқиш уйғотди.

Фаол иштирокчилар диплом ва эсдалик совғалари билан тақдирланди.

 

Аминбой Ортиқбоев, Мақсад Ҳабибуллаев (сурат), ЎзА