Абдусаид КЎЧИМОВ

Гоҳ бахтдан энтикиб балқди қуёшинг,

Гоҳ Жайҳунга сиғмай оқди кўзёшинг,

Эҳ, не-не ғамларни кўрди бу бошинг,

Бирда шом, бирда чўғ, бирда чақмоғим, –

                                                     Қорақалпоғим

Балки, Авестодан қадимдир шонинг,

Наслинг- қорақалпоқ, туркийдир қонинг,

Тошдан да қаттиқдир ҳар тишлам нонинг,

Қурдошим, элдошим, уруғ-аймоғим,-

Қорақалпоғим

Кимлардир, қашқирдек таладилар хўп,

Кимлардир, товонинг яладилар хўп,

Курашдинг, гоҳ ёлғиз, гоҳида тўп-тўп,

Эй, ёзни кўролмай, қувраган боғим, –

Қорақалпоғим

Кезиндинг, гоҳ Эдил, гоҳо Ёйиқда,

Ёғийлар даф қилди қонхўр айиқдан,

Кунларинг тўфонда қолган қайиқдай,

Бўрон, довулларда тобланган тоғим,-

Қорақалпоғим

Ул қора кунларинг армондир бу кун,

Сену мен – бир улуғ карвонмиз бу кун,

Жасур Юртбошимиз – сарбондир бу кун,

Овулим, бовурим, кўзим, қороғим,-

Қорақалпоғим

Оролга қайтмоқда эрка чорлоқлар,

Ёшариб бормоқда кенту қишлоқлар,

Устюртда чарақлар минг-минг чироқлар,

Энди ўчмагайдир – ўчмас чироғим, –

Қорақалпоғим

Бўстонга айлангай чўлларинг энди,

Юлдуздан ошгайдир қўлларинг энди,

Қуёшга кўмилгай йўлларинг энди,

Эй, меҳри булоғим, қалби қайноғим,-

Қорақалпоғим

Қорақалпоғим

30.03.2023 йил

Қорақалпоғистон ахборот агентлиги